15 | 12 | 2017
Bölmələr
Axırıncı nömrə

Arxiv
Axtarış
Ən çox oxunanlar
Hava proqnozu
Ziyarətçilərimiz

free counters

Элдин хва-Элхан!

Чи алаш-булаш, кьуд пад цIаяри кармашзавай, ягъ-ягъунри кьунвай девирда ван атай хъсан хабарри рикIер гьикьванни шадарда. Иллагь хьи, а хабар ви ватанэгьлидин агалкьунрикай, ада эл паталди кьиле тухузвай къени крарикай, гъиликнавай хъсан нетижайрикай... хьайила.
Ингье, ихьтинбурукай сад: “Чеченстан Республикадин кьил Рамзан Къадирова 4-июлдиз шадвилин гьалара кьиле фейи мярекатдал республикадин сагъламвал хуьнин министр Элхан Абдулан хва Сулеймановаз кьакьан бахшиш-Къадирован Орден гана.
Мярекатдал рахай Республикадин чIехида министр Элхан Сулейманован гьакъисагъ зегьметдиз, вичин везифадин буржи виждандалди кьилиз акъудуниз чIехи къимет гана. Ада Чеченстанда, сагъламвал хуьнин хиляй зурба, вили къадай агалкьунар гъилик авунин, адан кадрийрин таъминат хъсанарунин, абурун пешекарвал хкажунин карда жегьил министрдин пай чIехиди тирди къейдна.
Республикадин сад лагьай касдивай бахшиш кьабулай Элхан Сулейманова вичел авур ихтибардиз, зурба пишкешдиз килигна разивал малумарна, инсанрин сагъламвилин къаравулда мадни уях акъвазуниз гаф гана".
КIелзавайбуруз, иллагь хьи, интернетдин гьевескарриз Элхан Сулейманован къени крарикай хабар тахьана жеч.
Ахъадаказ лагьайтIа, хайи КцIариз хкведа лугьуз чна Элханан рехъ вилив хуьзвай. Райондин меркезда, Яргундаллай мукьва-кьилийризни хабар ганвай. Чи къаст адахъ галаз чин-чинел ацукьна ихтилатун, гьакъинда куьн патал марагъдалди кIелдай са макъала гьазурун тир.
Аквар гьаларай адахъ ихьтин мурад хьанатIани, мажал жагъанач жеди. ГьакIтирвиляй чна Спутник Азербайжан ТВ-ди Чеченстан-Азербайжан Дуствилин Тешкилатдин куьмекдалди чи ватанэгьлидихъ галаз кьиле тухвай ихтилат тIимил дегишвилелди куь ихтиярдизни гузва.

-Азербайжандай Чеченстандиз кьван Куь рехъ гьихьтинди хьана?
-Бакудин 245-нумрадин мектеб акьалтIарайдалай гуьгъуьниз зун Азербайжандин Медицинадин Университетдик экечIна. 1998-йисуз кIелер кьилиз акъудна, университет лап хъсан дипломдалди куьтягьна. Гьа йисузни Бакудин онкологиядин илимдин меркезда кIвалахдик эгечIна. И меркездин регьбер, тIвар-ван авай алим Жемил Алиеван гъилик са шумуд йисуз кIвалахайдай кьулухъ зун Москвадиз рекье кутуна. Ина академик Николай Блохинан тIварунихъ галай меркезда аспирантура кьилиз акъудна, илимрин кандидатвал хвена ва яргъалди гьана кIвалахна.
Ахпа за Александр Баранован регьбервилелди Аялрин сагъламвилин меркезда кIвенкIвечи илимдин кIвалахдарвиле зегьмет чIугуна. КIвалахдихъ галаз параллелдаказ АСШ-дин, Германиядин меркезра, клиникайра жуван тежрибани артухарна. 2014-йисуз Чеченстандин кьил Рамзан Къадирован теклиф кьабулна Москвадай Грозндиз атана. Ина зал онкологиядин диспансердиз регьбервалун ихтибарна.
Гила лагьайтIа, зун республикадин сагъламвал хуьнин министр я.
-Чеченстдандиз атунин теклиф къачун Куьн патал бейхабарвал хьанани?
-Са патай ун. Заз Рамзан Агьмедович чиз саки цIуд йисалай пара я. Ам кьакьан чирвилер авай, хушвал ийидай регьбер я. ГьакIтирвиляй адан теклиф за  "ваъ" лугьун хиялдизни тагъана жуваз мукьва са инсандин тапшуругъ, тавакъу хьиз кьабулна.
-Куьн министрвилиз тайинарун гьикIа, куьне и кар  фикирда кьунвайни, тахьайтIа хабар авачиз хьанани?
-Заз и кардикай хабар авачир. Сифтедай зи везифа Чеченстанда онкологиядин къуллугъ хкажун, гьакIни республикадин чIехидан сагъламвал хуьнин рекьяй меслятчивал тамамарун тир.
-Квелай и везифа кьилиз акъудиз алакьнани, къе республикада онкологиядин дурум гьикI я?
-Статистика вири Урусатдин Федерацияда сад я: и азардалди виринра дишегьлияр пара начагъ жезва. ГьакIни дишегьлийрин хуруйрин, тухулрин рак- азарринни, рекьинринни арада сад лагьай чкадал ала.
Чеченстанда месэладин фаркь, тафаватвал ам я хьи, ина дяве кьиле фенва. Ада онкологиядин къуллугъ тамам дарбадагънавай. Республикада ам саки цIийи кьилелай туьхкIуьр хъувунва. Къе чахъ и начагъвилин пациентар патал диагностикадин, сагъар хъувунин вири мумкинвилер ава. Идалай алава, чна маса регионрай, гьакIни Азербайжандай и жуьредин азар галукьнавайбур кьабулзава.
-Бес пешекарар гьикI, квехъ республикадин, гьакIни къерехдин пациентар кьабулна хъсанарун патал абур бес кьадар авани?
-Чна Москвадай, гьакIни Санкт-Петербургдай пешекарар дяветнава. Идалай алава, чахъ жуван-чечен миллетдикай тир хъсан алакьунар авай, уьлкведин гьар са пипIе лап зурба азарханайра кIвалахиз алакьдай докторарни ава. Республикада къецепатан уьлквейрин пешекаррини зегьмет серфзава. Чна Франциядай, Германиядай тир онкологрихъ галаз авсият хуьзва, меслятар къачузва, рагъакIидай патан коллегайрихъ галаз хъсан алакьаяр туькIуьриз алахъзава.
-Докторрин зегьметрин гьакъияр герек тир кьадарда гуз жезвани?
-Чун кIвенкIвечи пешекаррин зегьметдин гьакъи тайинардайла компромиссдал акъваззава. Кьакьан квалификацийдин пешекаррин мажибар Москвадин докторрилай са кIусни тIимил туш. Анжах ам Азербайжандинбурулай пара виниз я.
-Азербайжандай иниз къвез канзавай пешекарар гьикIа, авани?
-Ава. Анжах абур Ватанда ваъ, Москвада, Урусатдин регионра кIелзавай, уьмуьрзавай азербайжанвияр я. Чна са юкъуз абурузни теклиф ракъурун фикирда кьунва.
-Квез республикадин чIехидан сагъламвал гьикI аквазва?
-Пара хъсан! Завай хьайитIа адалай олимпиядин пара чемпионрин далу чилиз ягъаз алакьда. Ам сагълам я, актив я. Вичихъ пара хъсан планар, къастар ава хьи, и кардини чун лугьуз тежедай кьван шадарзава.
-Азербайжанвийринни чеченрин арада сагъламвилин културадин, физик гьерекетрин жигьетдай пара тафават авани?
-Азербайжанвиярни чеченар гьа сад хьиз начагъ жезва.


Р.С. Элхан Сулейманов министрвиле тайинарайдалай кьулухъ республикада сагъламвал хуьнин жигьетдай вили кьадай дегишвилер хьанва. Республикадин чIехида 14- июлдиз министр ва адан тешкилатдин вилик квай пешекарар кьабулайдалай гуьгъуьниз вичин “иnstagram”да ихьтин гафар кхьенва: “Чна  республикада сагъламвал хуьнин рекьяй революциядин дегишвилер авунва. Къе Чеченстан рагъакIидай патан уьлквейрин дережада авай сагъламвилин система, мягькем материалдинни, техникадин база, зурба алакьунар ва чирвилер авай пешекарри зегьмет чIугвазвай азарханайриз, диспаннерриз сагьиб республика я.”
2016-йисуз Чеченстанда умуми агьалидин гьар 1000 касдиз аватзавай кьиникьрин кьадар 4,1% тIимил хьана 4,7%-дал аватнава.
Гьелбетда, им чи ватанэгьлидин зурба зегьметдин нетижани я ва идалди чнани дамахзава.