19 | 10 | 2017
Bölmələr
Axırıncı nömrə

Arxiv
Axtarış
Ən çox oxunanlar
Hava proqnozu
Ziyarətçilərimiz

free counters

Кьилин тема канивал я

Филолог, журналист, шаир Гьилал Аскерован тIвар келIчийриз хъсан чида. Ада сифте хуьруьн мектебда литературадинни чIалан тарсар гана, яргъал йисаралди “КцIар” газетда мухбир, отделдин зеведиш, Дербентдин "Юждаг" институтда, маса вузра муаллим, кафедрадин регьбер кIвалахна.
Гьеле мектебдин йисарилай шиирар, гьикаяяр кхьизвай Гьилал Аскерован къелемдикай хкатай литературадин сифте чешнеярни “КцIар” газетда чап хьанай.
Алай чIавуз хизанни галаз Волгоград шегьерда уьмуьрзавай шаир-муаллимди инин "Дуствилин КIвал" тIвар алай дараматда Лезги чIалан курсар арадал гъанва. Шегьердин гъвечIи-чIехи талгьана лезги чIал чириз канзавай инсанри и курсара чIехи гьевесдивди иштиракзава.
Гьилал муаллим гьа са чIавуз туькIуьрунрихъни активдаказ эхгечIнава. Ада вичин жегьил чIаварилай инихъ кхьенвай шииррин кIватIал-"Битаввал" тIвар алай сад лагьай ктаб басма ийиз тунва. Шаир-публицист Фехреддин Оружеван редакторвилелди  Москвадин “Эдитус” чапханада экв акунвай и ктаб 5 паюникай ибарат я: "Зи ивиди кужумна вун, хайи чил"; "Уьмуьр бурж я вахтунивай къачузвай"; "РикIни вилер амукьда вал гьейран яз"; "КIватIи-кIватIаш"; "Жувазни икI кандай кхьиз”.  
Поэзиядин кIватIалда шаирди яхцIур йисалай гзаф девирда кхьенвай шииррин чешнеяр, гьакIни СтIал Сулейманан уьмуьрдин эхиримжи йикъариз талукьарнавай "ТуькIуьр тавур чIал" поэма гьатнава. Хайи халкьдин кьисмет, инсанрин арада авсият, канивал-заридин къелемдикай хкатнавай эсеррин кьилин темаяр я. Аялар патал туькIуьрнавай чIалар чи бицIекрин ругьдизни къилихриз диганва.
Садбуруз-гьакIан накьв,
        заз-чан я и чил.
Бубайрин руьгь кумай
         са тан я и чил.
Эл квачиз сувни чуьл
           баябанар я,
Халкь алаз хьайила
Ватан я и чил!-лугьузвай шаирдин сифте ктаб гьеле 35-40 йис идалай вилик басма хьана канзавайди тир. Авторди ктабдин вилик “РикIе лирли аваз” кьил алаз ганвай сифте гафуна икI кхьизва: “Мукьвара заз жуван архивдай алатай асирдин 80-йисариз зари Забит Ризванова “Азернешр” издателстводи басмадай акъудун патал пландик кутунвай зи шииррин кIватIалдиз кхьей рецензия гьатна. Поэзиядал рикI алайбуруз халисан халкьдин шаир яз чизвай Забит малим а чIавуз цIийиз СССР-дин Кхьинардайбурун Союздин член хьанвай. Адахъ гьа титулар хьаначиртIани, халкьдиз сейли ва гьуьрметлу чIалан устаддин гъиликай хкатнавай кхьинар зун патал багьа аманат я. А чIавуз издателстводи зи улуб акъуд тавун паталди вири рекьериз гъил вегьенай. Амма им маса ихтилатдин тема я. Куь гъилевай и улуб сифтегьанди хьуниз килигна чIехи зариди урус чIалалди кхьей рецензия за авайвал гузва.”
Са шиирда-
Авайди тек са мани
яIтани билбилдихъ,
Герек я ам алемдиз;
Са шиирдив машгьур хьайи шаир хьиз-кхьизватIани, чун шаир Гьилал Аскерован къелемдикай цIийи-цIийи шиирар ва поэмаяр хкатдайдал рикIивай чIалахъ я.

 Омар КЪАЗИХАНОВ