25 | 05 | 2017
Bölmələr
Axırıncı nömrə

Arxiv
Axtarış
Ən çox oxunanlar
Hava proqnozu
Ziyarətçilərimiz

free counters

Чун Ватандал ашукьарзавай поэзия

КцIара шаир Бажиханум Исаевадин туькIуьрунриз бахшнавай поэзиядин мярекат

Метлеб кьилиз тухуз

 жедай,

Гаф чкадал лугьуз жедай,

Жуван къадим тIвар хуьз

  жедай,

Халис лезги шаир я зун!

И гафарик са кIусни таб, дакIурун галач. Къе вичин уьмуьрдин 77-гатфардин къаншардиз экъечIзавай Бажиханум Исаева чи поэзияда кьилди жигъир-гел кутунвай халис лезги шаир, кIелзавайбурун рикIер мили, милли, гьакIни викIегьвилин гьиссерив ацIурзавай чIаларикай, гъезелрикай, риваятрикай, поэмайрикай ибарат вад ктабдин- "Кефер патакай ихтилат", "Зи гъед", "Хва канзава Ватандиз", "Муьгьуьббатдин рагъ", "Дамаха, къелем!" автор я.

Алатай кишдин юкъуз КцIарин меркездин ктабханадин залда шаир Бажиханум Исаевадин туькIуьрунриз бахшнавай мярекат кьиле фена.

Гаф къачур “Алам” журналдин кьилин редактор Камран Къурбаналиева шаирдин уьмуьр ва туькIуьрунрикай ихтилат кудна:- Бажиханум Исаева 1940-йисуз ЭчIехуьре муаллимдин хизанда дидедиз хьана. Адан буба Исаев Гьажи Къадиран хва урус чIаланни литературадин муаллим, гьакIни хъсан тар ядай, чи манийрал, баядрал кьару, абур хуьнин ва теблигъ авунин, жегьил несилрив агакьрунин карда гьевес къалурдай кас тир. Диндин рекьяйни чирвилер авай Гьажи муаллимди вичини шиирар кхьидай, аялрин кIелунин къайгъуда амукьдай.

Ихьтин манидин, шиирдин муг тир са кIвале дуьнядал атай Бажиханум фолклордал, литературадал рикI алаз чIехи хьана.

Хизан туькIуьрайдалай кьулухъ ада яргъал йисара Урусатдин Магадан вилаятда   уьмуьрна. Гъурбатда багърийрихъ, Ватандихъ цIигелвили шаирдин илгьам мадни ифирна, ада Кефер патан викIегь, жумарт инсанрикай "Кефер патакай ихтилат" тIвар алай са ктаб ацIай шиирар кхьена.

“Марвар” литературадин межлисдин кьил, шаир, гьа кIни Бажиханум Исаевадин "Дамаха, къелем!" ктабдин редактор Эйваз Гуьлалиева чи ханум къелемэгьлидин поэзиядин кьетIенвилерикай ихьтин гафар лагьана:-Адан шииррай чаз хайи тIебиат, чи дагъ-раг, генг яйлахар, къацу чуьллер, берекат квай никIер, мублагь чилер, шуршуриз ргазвай булахар, ван алаз авахьзавай дагъдин вацIар аквазва. Шиирра авай тIебиатдин шикилри кIелзавайди кIанзни-такIанз вичихъ ялзава, хайи чилин кIубанвилиз къимет гуз, мад гъилера хайи Ватандал ашукь жез мажбурзава.

"КцIар” газетдин редактор Видади Севзиханова шаирдин лезги кьегьал Валегь Багъироваз бахшнавай "Хва канзава Ватандиз" поема Къарабагъдин дяведикай лезги чIалалди кхьенвай сад лагьай эсер тирди, анай чи чилер хуьнин рекье чанар эцигай вири лезги рухвайрин къаматар аквазвайди къейдна.

Карчи инсан Бегьрам Залова, шаир-муллимар Шихжамал Шихметова, Шагьмардан Агъакишиева, Зиядхан Мурадханова, Вакъиф Муьшкуьрвиди, Лезги Бегьлула, Зерифа Кьасумовади, журналистар Абир ЭчIехвиди, Руслан Шайдаева ханум шаир тебрикна адаз чандин сагъвал, мадни вили кьадай агалкьунар тIалабна.

КцIарин мектебрин кIелзавайбуру шаирдин шиирар хуралай лагьана.

Шаирди вичи, уьмуьрдин юлдашди, стхайри ва маса багърийри хайи Ватанда ихьтин межлис тешкилунихъ къуьн кутурбуруз, райондин тешкилатрин регьберриз, вири иштиракчийриз разивал малумарна.

Шаирди вичин са кьадар ктабар райондин ктабханадиз пишкешна.         

  “КцIар”