Театрдин югъ сегьнедал къейдна

10-мартинин няниз Гьукуматдин КцIарин Лезги Драмтеатрдин залда чIехи мярекат кьиле фена

Райондин чIехибуру, сегьнедал рикI алайбуру иштирак авур мярекатдал милли театрдин тарихдикай рахай Гьукуматдин КцIарин Лезги Драмтеатрдин директор Фаикъ Къардашова лагьана хьи, зурба камалэгьли Мирзе Фетели Ахундзадедин драмадин жанрда кхьей эсерри Азербайжанда театрдин сенятдин бине кутуна. 1873-йисан март-апрел варцара Бакуда чIехи маарифчи Гьесен бег Зердабидин ва драматург Нежеф бег Везирован инициативадалди Мирзе Фетели Ахундован “Ленкерандин хандин везир” ва “Гьажи Къара” комедияр сегьнедал эцигна. Идалди тек Азербайжанда ваъ, вири Рагъ-экъечIдай пата театрдин бине кутуна. И тарих Азербайжандин Милли Театр яранмиш хьайи югъ хьиз къейдзава. Театрдин директорди ахпа Азербайжандин театр фейи рекьикай, адан зурба корифейрикай, кьилдинвал гъилик авурдалай кьулухъ чи уьлкведа театрдин сенятдиз къалурзавай къайгъудикай ихтилат кудна, “Театр ва театрдин кIвалахдин гьакъинда” Закон, 2007-йисуз “Азербайжанда театрдин сенят вилик тухунин гьакъинда” Президентдин указ кьабулнавайди, 2009-йисан 18-майдиз девлетдин башчиди “Азербайжандин театр 2009-2019-йисариз” Девлетдин Программа тестикьарнавайди къейдна. Вич арадал атун муаллим-драматург Мирзали Руьстемован “Садаз паб, садаз таб” комедиядив лишанлу авур театрдин сегьнедал къениндалди чара-чара жанрийрин 60-даз мукьва тамаша эцигнавайди тамашачийрив агакьарай сенятчиди коллективдиз чIехи куьмекар къалурзавай райондин крар кьилиз акъуддай властдин чIехид тир Шаир Алхасоваз разивал малумарна. ЦIинин йисуз чIехи Уьзейир Гьажибегов дидедиз хьунин 130-йисаз талукь яз 3-апрелдиз адан “Аршин мал алан” оперетта сегьнедал къалурун пландик кутунвайди къейд авур театрдин директорди сегьнедал рикI алайбур и сенятдин макандиз дяветна. Райондин културадин ва туризмадин отделдин зеведиш Давид Ибрамхелилова Гьукуматдин КцIарин Лезги Драмтеатрдин коллектив, гьакIни театр канибур и кар алай йикъаз килигна тебрикна, садбуруз яратмишунин агалкьунар, муькуьбуруз хъсан ял ягъадай вядеяр тIалабна. Маракьлудаказ кьиле фейи мярекатда тамашачийри чи театрдин сегьнедал чара-чара йисара къалурай “Аршин мал алан”, “Шуршурали”, “Им тахьурай, а тIад хьурай” эсеррикай чIукваризни килигна.  

Кемале