Бубайрилай аманат хуьр-МуЧугъ

Чи хуьрерин гьарадахъ вичиз хас иервилер, мензереяр, акунар ава. Пунар дегь берейриз акъатзавай Мучугъ хуьруьн бине кутурбур дерин акьул, пайгар фагьум авай ксар хьун шак гъиз тежедай кар я.
Кьуд пад тамар, тулар, кIамар,       уьруьшар, булахар тир и макандиз гьар илифайла инсандин рикI ахъа жеда. Гьа хуьруьн тIвар алай вацIу Мучугъ кьве патаз пайзава. Са шумуд йис вилик вацIун винел вегьенвай мукъуь кьерер галкIурзава. Гзаф вацIарилай тафаватлу яз инаг михьиз хуьзва, гьар акатай шеъ гъиз цин хуруз вегьизвач.
Са шумуд сятдин къене чаз “гидвал” авур чкадин мектебдин директор Заур муаллимдин лугьуниз килигайла, гуьгъуьнин цIуд йисан къене къад    касдилай виниз мучугъви элкъвена шегьеррай бубайрин макандиз хтанва. Абурук Заур муаллимдин са шумуд мирес-Мелик, Аманат, Къайиб Султановар, гьакIни Абумуьслуьм Шихсаидов, Дилман Жабраилов, Багъир Багъиров ва масадбур гала.
Абумуьслуьм Шихсаидов хьиз бубад къул куькIуьр хъийизвайбурни ава, цIийи дараматар эцигна кIвал-югъ кутазвайбурни. Санлай къачурла эхиримжи цуд йисуз хуьре 47 цIийи кIвал эцигнава,  200-аз мукьва мучугъви бицIек дуьнядиз атанва.
“Гъугъванрин мягьле” хуьруьн цIуру пипIерикай я. Ина са несилдин векилар тир Идрисовар, Шихсаидовар,  Новрузовар яшамишзава. Жегьил берейра Сумгаитда уьмуьрай Абумуьслуьм ва адан уьмуьрдин юлдаш Незакет гила “хуьруьнвияр” хъхьанва. Пуд виш йисан уьмуьр авай кIвал хьиз бубайрилай, бадейрилай амай эменнияр-халичаяр, камарияр, лап чихрани багьа аманатар хьиз хуьзва абуру.
 Хуьре 6 туьквен, регъвер, кIарас чIугдай мишердин цех кардик гала. Гъенерал 70-аз мукьва машин, 2000-аз мукьва мал-къара алай мучугъвийри 800 гектарда экягъ хьанвай салара, багълара, никIера гьакъисагъ зегьмет чIугвазва.
Яшамишун-инсандин вилик галай сифте къаст я. Хъсан уьмуьр гьалун, хизан туькIуьрун, кIвал эцигун, веледар чIехи авун-ибур векIегьбурун кьисмет я. Къе алакьунар авай, зегьмет чIугвазвай гьар са касдин яшайиш хъсан я Мучугъа.               Садай