Сертификатарни гана, пекерни

Чи пак дин хуьн, адаз басрухарзавайбурун виликпад кьан, Исламди тIалабзавай буйругъар рехне, бафта галачиз кьилиз акъудун-алай чIавуз динэгьлийрин вилик акъвазнавай везифайрикай я.
Жез-тежез, чиз-течиз ясдин межлисар кьиле тухуз алахъзавай, мукъаддас Къуръан чпиз кандайвал тефсирзавай даллалар арадал атуни жемиятдик къалабулух кутунва. И везиятдай экъечIунин рекьер жагъурзавай Къафкъаздин Мусурманрин Идаради диндин векилар патал чирвилер артухардай курсар тешкилна.
И курсара чи райондай пуд касди-Къафкъаздин Мусурманрин Идарадин КцIара векил, Мустафа Каздал мискIидин имам Феряддин Регьимханова, и ижмадин динэгьлияр Жабир Асланов ва Вадир Мустафаева иштиракна. Курсар куьтягьайдалай гуьгъуьниз абуруз талукь сертификатар гана.
ЦIининдалай кьил кутуна уьлкведа чпихъ талукь чирвилер ва документар авай диндарриз алукIдай махсуси формаярни гурвал я. Чи районэгьлияр пул галачиз гузвай и пекер къачунвай сифте динэгьлияр я.
ЧIалахъ жез канзава хьи, чирвилер артухарна дипломар къачун и пуд касдалди куьтягь жедач. Чи райондин гьар са хуьре диндиз, халкьдиз дуьзвилелди къуллугъдай, кьакьан чирвилер авай диндарриз чIехи игьтияж ава ва ам таъминарун герек я.                           

“КЦIАР”