Ирид дуст хьана гьатна Чун рекье…

Докторри чешне къалурна: сагълам уьмуьр гьалунин, Ватан чир ва кан хьунин

Алатай йисуз чи ватанэгьли, Урусатдин Волгоград шегьерда уьмуьрзавай къени инсан, доктор, медицинадин илимрин кандидат Фирудин Абдуллаеван инициативадалди кьиле фейи велопоходдикай малумат ганвай. Ингье, цIи докторрин “дружинади” (группадин чIехид Низами Рустамов-КцIар, Рафик Медетов-Хачмаз, Чингиз Абдуллаев-Баку) а инициатива адетдиз, къерехдавайбуруз чешнедиз элкъуьрна. “Вахт авач, аялри кIелерзава, отпуска Анталияда кьилиз акъудна…” лугьузвайбуруз акси яз Фирудин доктор гатун сифте кьилера хайи КцIариз хтана, вични тек ваъ, мугьманар галаз. -Алатай походдилай гуьгъуьниз чун Дон вацIун целлаз сиягьатдиз экъечIнай. Ина чун Волгоград ва Урюпинскдай тир тIебиатдин гьевескаррал расалмиш хьана. Фад са-сад авурда акьуна дуствилин икьрар ктIунай чна, виликай къвезвай гатуз абуруз КцIариз атун теклифна. Игор ва Андрей Юхневичар, Владимир Романченко, Павел Медведев-ибур вири чи (Волгограддин) вилаятда тIвар-ван авай бизнесменар, зурба капиталдин, мулкарин сагьибар, идарачивиле вини кьиле чка авай инсанар я. Мугьманар КцIарин акунрив, экъведай, аквадай чкайрив таниш хьайидалай кьулухъ Эвежугъда лезги мехъеррин сейли иштиракчийриз элкъвена. Чи шадвилин мярекатдик мукьувай иштирак авур сиягьатчияр деминал, гьарай-эвер алаз свас гъунал, сусан вилик цIаяр акъудунал гьейран хьана. Пакад юкъуз “Шагьдагъ” туризмадин комплексда ял ягъай мугьманар ина туристар патал туькIуьрнавай кьулайвилерилай гзаф рази амукьна, ам дуьнядин тIвар-ван авай чкайрик галаз гекъигъ жедайди лагьана. Лаца и хуьруьн эгьли Мевлудан мугьман хьайи походдин иштиракчияр “цIий лезгидихъ” галаз ингилис чIалалдини рахана, хуьруьн тарихдикай малуматар къачуна, афар ва цкIан хътин тямрикай дадмишна. Гьуьлелай 2800 метр кьакьанвилиз хкаж хьайи группади ина гзаф шикилар ягъана, чи тIебиатдин акунар лентиниз къачуна. КцIариз “сагърай” лагьай мугьманар Набрандиз рекье гьатна. Абурун гуьгъуьнин маршрут ла- гьайтIа, Шеки-Баку-Волгоград хьана. Доктор Фирудина ва адан дустари чпин ватанпересвал гафаралди ваъ, краралди, чешнедалди субутна: чи халкь, адан адетар, ял ягъадай чкаяр къурабайриз чирна, чибуруз сагълам уьмуьр гьерекетдихъ, экъуьнихъ галаз алакъалу тирди къалурна. Хъсан чешне тушни, дустар?

Видади