“Циригъилер” тежен чун

Тек са жувахъ ял тийин, хуьр-квал, мягьле патални хийирлу крар кьилиз акъудин!

И мукьвара Манкъулидхуьруьз мугьман хьанвай зун. ТIвар хуьр ятIани, инаг гъвечIи, иер шегьердиз ухшар аквада…И хуьруьн куьчеяр асфалт, къерехра магазинар, кIвалера телефонар-интернет, чIехи заридин тIварунихъ галай мектеб, мехъеррин кIвал ва икI мад.
И гъилера зун  са цIийи, абад чкадални гьалтна:кьулан мягьледин жемятри ял ягъун патал туькIуьрнавай пипIел!
Хуьруьн чIехи ксарикай тир Зилданбег Гьажимурадова цIийи объектдин гьакъинда икI лагьана:
-Чан хва, советар чкIайдалай кьулухъ инсанар саки чIуру патахъ къекъвенва, гьарда вичихъ ялзава. Вилик чIавара акI тушир:инсанри гъил-гъиле гана виридаз хийир гун патал кIвалахдай. Гила лагьайтIа, чун “циригъилер” хьанва…тек са вичихъ ялзава. Хъсан хьана чи мягьледин жегьилри ял ягъун патал вижевай чка туькIуьрнава!
Квез аквазвайвал, и чкадин юкьвал, къацу таран кIаник столни скамейкаяр, булахдин комплекс (дуьз я гьеле яд гъанвач )эцигнава, ракIар кутуна сетка элкъуьрнава. Нянрихъ жегьилар нерд, домино къугъвада, рехи ксар кIватI хьана ихтилатдал илигда…
Чи райондин муькуь хуьрерани ихьтин чкаяр туькIуьриз алакьнайтIа, вуч хъсан кар жедай!                            

Вакъиф