Гьулдан хьиз кIевира жуван къизил гаф…   

Алай йисуз чIехи зари Генжеви Низами дидедиз хьайидан 880 йис бегьем жезва.  Идаз килигна 2021-йисни чи республикада “Низами Генжевидин йис” баяннава.

Шаир-таржумачи Вакъиф Гьажиагъаева классикдин “Хосровни Ширин” поэмадай чи чIалаз элкъуьрунар авунава.

Чна агъадихъ гьа поэмадай кьве чIук куь ихтиярдиз гузва.

 

 

ГАФУНИН ТАРИФ

Акъвазмир, Низами, кIвалахдай чIав я,

Дуьня вич фани я, кьисмет къарав я.

Чандин чешмедай тIуз ша вун гатфарал,

ЦIийи пек на алукI жуван гафарал.

Ваз язух ша, на яхъ гъиле са чуьнгуьр,

Ван хкаж чуьнгуьрдин ажеб верцIи тир.

Вахт тушиз экъечIмир вун фидай рекьиз,

Душманди чим ийид са къван ви кьилиз.

Гьуьлдан хьиз кIевира жуван къизил гаф,

Авудрай къиметдай къизил вич гзаф.

Кьел квачир гафарин куьз я гереквал,

Гьи касдиз хуш къведа ичIи гафни чIал?

Шиирдин кIалубда гафар тун-регьят,

Ваз гила герек я чIугван азият.

Гафарин сан-кьадар самбар яз тахьуй,

Садакай виш тахьуй, вишдакай сад хьуй!

Гафунихъ цихъ хьтин бегьервал гала,

ТIимил тир гафарихъ иервал гала.

Инжидин михьивал кватIани цик,

Ам гзаф хъваз тахьуй, акатда тIалдик.

Инжи тир гаф хкягъ, тIимил рахуй сив,

Чи алем ацIурай тIимил гафарив.

ТIимил тир гафарин алахьдач мана,

Гзаф хьай гафарин къимет кьацIана.

РикIиз хуш цуьквер кIунчI хъсан я, гьелбет,

Рат ацIай векьелай виниз я къимет.

Экв алай гъетери цав чIагурайтIан,

Икрама Ракъиниз-гьам я чаз масан.

Гъетерив ацIайтIан михьи цавун чин,

Алемдиз Ракъини нур гузва якъин.

 

 

ХВА МЕГЬАМЕДАЗ НАСИГЬАТ

Зи иридсавай хва, зи вилерин нур,

ТIвар мецел алазвай, зи рикIин суьрур.

Рузу ваз ганва хьи, первардигарди,

Вал алайд зи тIвар туш, тIвар я гьаданди.

И гьилал чIавуз вун хъуьрехъ, ийимир на гъам,

Шумуд югъ хъуьренай зунни яз хуррам!

Варз ацIай вядеда иер тир гьилал,

Ваз авай акунри нур хъчид цавал.

Къачу на чирвилер, дуьня кьатIудай,

Марифат чира хьи, мана атIудай.

Ката вун гафункай мана авачир,

Илагьи илимар чира, чеб хуш тир.

Вун намус гвайди  хьухь, хуш хьурай гьарниз,

“-Баркалла хьуй, Низами, акьуллу хциз!”