И дуьнеда вичин сеферар кьилиз акъудна

Чи эдебиятда, публицистикада вичиз хас гел, хатI авай къелемэгьлийрикай тир Гьажибала Къафланов (Яргунви) пуд югъ вилик чавай къакъатна.
1938-йисан ноябрдиз чи райондин Яргун хуьре дидедиз хьайи Гьажибала Мирзедин хва инин мектеб акьалтIарна меркездиз-Бакудиз фена. Жегьилди Бакудин Гьуьлерин Мектеб куьтягьна яргъал йисара «Каспар» идарада мотросвиле, моториствиле, кьилин электриквиле ва маса везифайрал кIвалахнатIани, дафтар-къелем гъиляй вегьенач, шиирар кхьиз эгечIна. Адан туькIуьрунрин чешнеяр мукьвал-мукьвал Азербайжандинни Дагъустандин газетрин чинриз, кIватIалриз акъатна. Лезги чIалал рикI алай, вичин шиирра хайи чIалан тIям хуьз алахъзавай шаирдилай чи эдебийятда вичиз хас кьетIен гел кутаз алакьна.
Ам “Муштулух”, “Бахтлу рехъ”, “Генерал Магьмуд Эбилов”, “Асиррин эсер ва я хушбахтвилин ачарар” ктабрин, “Илимдин кукIушриз” монографиядин (Элман Халиловахъ галаз санал) автор я.
1995-1998-йисара ада “Азернешрда” лезги эдебиятдин шуьбедин редакторвиле кIвалахна. Гьажибала Яргунви гьакIни 1997-йисуз и нешриятди басма авур “Шагьдагъдин гъетер” кIватIал туькIуьрайди ва редакторни я.
Адаз халкьдин, кIелзавайбурун машгьурвал гъайиди чи кьегьал хва, генерал Магьмуд Эбилован уьмуьрдин ва женгинин рекьикай къелемдиз къачур, пуд-лезги, азербайжан ва урус чIаларал чап хьайи- “Генерал Магьмуд Эбилов” повест-поэма я.
Уьмуьрдин са шумуд йис серф авуна арадал акъудай и ктаб паталди фактар, делилар кIватIиз сиягьатдиз акъатай кхьираг, къецепатан уьлквеяр хкатуналди, саки генералдин кIвачи атIай вири рекьер-хуьлер тикрар хъфена.
Шаир-журналистди вичин къаст кьилиз акъудна, Ватандин Чехи дяведин машгьур комдивдикай гьам тематикадин, гьакни формадин жигьетдай вижевай, рикIелай тефидай вакъиайралди бул повест-поэма арадал гъана.
Вири уьмуьр Бакуда фейи начагъ, кьуьзуь шаир са шумуд йис тир хайи райондиз хтана. Ам мадни секин акъвазнавачир: теклиф къачур ватанпересвилин тербиядин, поэзиядин мярекатра иштиракзавай, жаванриз вичин ктабар пахшзавай, уьмуьрдин рекьикай, сиягьатар авур уьлквейрикай ихтилатарзавай.
Дамахдалди “ирид гуьлелайни пуд вацIалай гими гьалай шаир я зун”-лугьудай шаирди и дуьнеда вичин сеферар КцIара кьилиз акъудна.
Аллагьди рагьмет авурай.