Фаридан суракьда экъведамаз

…мад са кьегьал ччир хьана чаз. Ясабви Муьслуьмоврин хизандин кьве хва-Фаридни,    Элманни Гъалибвилик пай кутунвай кьегьалар я.

– Чи хуьуруьнви Себеддина хци вад медал къачунва, квез хабар авачни муаллим? – жузуна завай са ясабви ччирхчирди.

– Вад медал? – зани адан суалдиз жуван мягьтелвал квай суалдалди жаваб хъгана.

Ясабиз зенгна хуьруьн кьилевайбурувай Себеддин, адан хизандикай, кеспидикай хабарар кьурла, жаваб    “…гьа хуьруьнви я ман, вичин югъ нянарзавай. Кеспи? Сая инсан я, фу накьвадай, чилей акъудзавай…”-хьана.

Ахпа чун  и хизандин саки виридахъ галаз луькIуьнна: Себеддинахъ, адан уьмуьрдин юлдаш Элвинадихъ, чIехи хва Элманахъ галаз. Ватсап асул кесиб ксар паталди ижаднавай яракь я кьван: райондин газет гужуналди вацра садра акъудзавай журналистрин, рухваяр кьвед-кьвед, пуд-пуд ягъунриз ракъурзавай диде-бубайрин, са кап фан гьуьгъуьна гъурбатриз акъатнавай жаван хизанринни абурун кьуьзуь диде-бубайрин…

Са Фаридахъ – вад медалдин кавалер тир кьегьалдихъ галаз алакъа хуьз алакьнач чалай. Фарида вичин аскервилин амай пай душмандин пацукай азад авунвай районрикай сада давамар хъийизва, ам Аллагьдин куьмекдалди вилик квай гатфариз хайи мукув агат хъийида.

Фарид – Муьслуьмоврин хизандин кьвед лагьай хва, виридалайни гъвечIи аял я. 2020-йисан апрелдиз аскервилиз эвернавай ада сентябрдиз гатIумай дяведин виридалай къати женгера иштиракна. Фуьзулидилай кьил кутуна та Шушада кьван женгинин рехъ атIай Фарид вичин ротадин лап хъсан, викIегь аскеррикай сад хьана.

Шушадив агатайла абур Нахчевандай атанвай хсуси тайинатдин жегчийрихъ галкIана. Ина ам азим кцIарвийрал расал хьана, танишвилер гана.

Шушадин шегьердин гирведал сифте Азербайжандин пайдах алкIурай полковник-лейтенант Решад Асланова  гъалибвал лап мукьвал алайди лугьуни Фаридак, адан аскер дустарик руьгь кутунай.

Са хва аскерда аватIани,  Муьслуьмоврин ракарал мадни эверунин кагъаз гвайди атанай. КIвалин чIехи хва Элмана аскервал кьуд йис вилик алуднавай. Ам ана гьакI кIвач гатана хтанвачир. 2016-йисан апрелдин ягъунрин иштиракчи хьайи Элманаз дяве, ягъ-ягъун вуч ятIа хъсан ччизвай. Анжах мадни кьве рикIин хьанач:вич вилик жергейриз ракъурун тIалабна.

Стхаяр садаз-садакай хабар авачиз Шушада кьван акъатна. Элмана Гьадрут, Хожавенд, Жабраил ва маса чкаяр къахчунин ягъунра, иллаки виридалайни къатидаказ фейи Яру Базар паталди женгина мукьувай иштиракна.

Фарид лагьайтIа, Хожавенд, Зенгилан, Жабраил, Шуша ва Агъдам къахчунай медалриз лайих акунва.

Себеддин ва Элвина Муьслуьмовар жаван хизандин сагьибар я. Абру анжах чIехи велед-руш Гуьлмира динжарнава. КIвалин хутулрин кефер хкудун вилив хуьзвай папанни гъуьлуьн мурадар са акьванни зурбабур туш: рухвайри кеспи къачун, хизан дарвал тагана хуьдай  кIвалахдалди таъмин хьун.

– Гьелбетда, рухвайри медалар къачуни чун шадарзава, кIвалин, хуьруьн, элдин кьил цавуз хкажна-лагьана хизандин чIехида-Анжах дяведин гьар са иштиракчи, къагьриман кардалдини таъминарун чарасуз я. Чна идак ппара умуд кутазва.

Гьа икI, са къагьримандихъ экъведамаз кьвед жагъана чаз. Муьслуьмоврин хизандин кьве хва-Элманни Фаридни Гъалибвилик пай кутунвай кьегьалар я.

Абуру динж уьмуьрдани чпиз лайих тир чка кьунал, диде-бубадин, вахан мурадар керчекарунал кIевелей чIалахъ я чун.

 Видади