Са хизандай пуд игит

30-йисуз эрменийрин пацук хьайи чи чилер вахчун патал 2020-йисан сентябрдин 27-аз гатIумай Ватандин дяве 44 юкъуз давамна. Халкьдин кьегьал рухвайри душманди кьунвай чи ирид район азадна. И дяведа агъзурралди кьегьалди Ватан патал чпин чанар къурбандна. Абурун игитвал, тIварар гьамишанда чи рикIера амукьда.

Ахьтин хзанарни авай хьи, и женгиниз кьвед, пуд хва рекье тунвай. И макъалада заз гьа дяведа иштиракна, адан цIаярикай сагъ-саламат хкатнавай чи хуьруьнви пуд стхадикай рахаз канзава.

Вучиз ятIани, инал зи рикIел Алирза Саидован цIарар хквезва:

…ЖедатIа мад дявеяр?
Хъел къвемир квез, зун икI векъиз рахайла,
Вуч паталди халкьнава куьн, дидеяр,
Ватан хуьдай рухваярни тагайла?!

Эхь, дидейри рухваяр Ватан, хайи чил, кIвал, хизан хуьн паталди хада.

И дяведиз манкъулидхуьруьнви Араз Султалиева пуд хва рекье тунвай. Аллагьди адаз сад-садан гуьгъуьналлаз пуд хва бахшнавай: Бегьрам, Бегьман, Камран.

ЧIехи хва Бегьрам 1996-йисуз дидедиз хьанва, 2011-йисуз 9 лагьай синиф куьтягьна техникумдиз гьахьна, Бакуда Гьуьлерин мектеб акьалтIарна. Гуьгъуьнай Азербайжандин Кьушунра аскервал авуна. КIвализ хтайдалай кьулухъ, 2019-йисалай МАХЕ-дин жергейра къуллугъдал акъвазна.  Ада сентябрдин 27-аз гатIунай II Къарабагъдин дяведа сифте йикъалай иштиракна. Декабрдин 17-даз кIвализ хтана. Ада хсуси тайинатдин частуна къуллугъна, кьве медални ава.

Аразан кьведлагьай хва Бегьман 1998-йисуз дуьнядал атана. Вири хьиз юкьван мектебдиз фена, 2015-йисуз  мектеб акьалтIарна, Сумгаитдавай Девлетдин Университетдин тарих-географиядин факултетда чирвилер къачуна. 2020-йисуз кIел кьилиз акъудна аскервилиз рекье гьатна. Адани вичин чIехи стхади хьиз и дяведа гьа сифте йикъалай гъиле яракь кьуна, Физули, Жабрайил районар душмандикай азад авун патал ягъунра иштиракна. Ада алай чIавуз аскервал давамарзава.

Абурун гъвечIи стха Камран 1999-йисуз дидедиз хьана.  2016-йисуз юкьван мектеб акьалтIарна, 2017-йисуз аскервилиз рекье гьатна. Аскервилин буржи кьилиз акъудна, хтана кIвале авай жегьил дяведин цIай чкIайла вичин чIехи стхаяр хьиз Ватандин вилик вичин хвавилин гьече кьилиз акъудун патал  рекье гьатна, женгера иштиракна. Физулидин мукьув хьайи женгера адал хер хьана, гьоспиталда дава-дарманар авуна, гьакI ятIани, адан эрчIи вилиз ахквазмач, инвалид хьиз пенсиядиз акъатнава.

Эхь, Ватан хуьзвайди ихьтин кьегьал рухваяр я. Дяве куьтягь хьанва.Чи мурад ам я хьи, мад са чIавузни дяведин цIай чи чилел куькIуьн тавурай. Рухваяр саламат хьурай, абурун игитвилин, хъсан крарин суракь анжах зегьметдин, илимдин, туькIуьрунрин майданрай атурай. Амин!

Римма Гьажимурадова