Ада кьегьал хуьруьнвийрин рехъ давамарна

Вичихъ пуд агъзур йисарин тарих авай Хьиларин хуьр вичин кьегьал рухвайралди сейли я. И цIарцIяй тек са Хьиливи Яралидин тIвар кьун, заз чиз, бес жеда.

Алай девирдани чи хуьряй викIегь рухваяр акъатзава: Загьир Закиран хва Рзаев, Даир Аятуллагьан хва Шагьбазов, Тураж Сулиддинан хва Гьемзеев, Уьмуьд Радифан хва Хенжелов… Нагагь тIварар кьунвай сифте кьве кас  I Къарабагъдин игитрикай тиртIа,  мукькуь кьвед II Къарабагъдин дяведин кьегьалрикай я! Аллагьди кьудазни рагьметрай!

Кьисметди гьикI къаланватIа аку садра: чи хуьруьнвияр Даирни Загьир шегьид хьайи йисуз Уьмуьд Радифан хва дуьнядал атанва. Им 1994-йис тир.

Уьмуьд Хенжелов хуьруьн юкьван мектеб акьалтIарунни Ватандин вилик квай вичин пак буржи-аскервал кьилиз акъудун патал рекье гьатна. Хъсандаказ къуллугъ авуна, аскер юлдашрин ва командиррин гьуьрметдиз лайих  хьана. Адаз чIехи-гъвечIи чидай, гьар садан хатур-гьуьрмет хуьдай, зегьметдал рикI алай. Виридалайни кьетIенди-и хьиливидин хциз са куьнкайни кичIедачир.

И эхиримжи къилихдини адан уьумуьрдин рехъ тайинарна. Уьмуьд Радифан хва 2014-йисуз МАХЕ-дин (Вахтунлай Виниз Къуллугъдай Идарадин) жергейриз кIвалахал гьахьна. Женгчи-вични кадрдин къуллугчи хьун-им гьар са юкъуз, гар са сятда душмандихъ галаз чин-чинал атун, кьиникь вилин кIаник гъун лагьай чIал тир. И кар, са юкъуз Ватандин чилер ягъи душмандин пацукай михьун патал женгер гатIумдайди Уьмуьдазни, адан яракьдин дустаризни хъсан чизвай.

Къуллугъдани-регьят кеспи хкягънач. Адакай алакьай разведчик хьана. Чи кьегьал хуьруьнви алай йисан сентябрдин 27-даз Ватандин чилер душманрикай михьун патал дяве гатIумай сифте сятдилай ягъ-ягъунра гьахьна. Арадай цIуд югъ фейила Хьилар хуьруьз Уьмуьд шегьид хьуникай чав чкIана: Сукъовушан паталди кьиле фейи женгера  Уьмуьд Радифан хва Хенжелов душмандин гуьлледиз туьш хьана!..

Вири къанни ругуд йис уьмуьр гьалун кьисмет хьайи Уьмуьдахъ кIвале пуд кьил хизан ама: уьмуьрдин юлдаш-Зарина, пуд савай руш-Уляна ва йисни тIатIанвай хва-Омар.

Азербайжан Республикадин гьукуматди Ватан патал чанар гайи ксарин хизанрин къайгъуда амукьунин, шегьидрин, къазийрин хизанриз пулдин такьатар чара авунин патахъай серенжемар кьабулнава. Хуьруь, мукьва-кьилийрини чпин гъиляй къведай куьмекар авуналди и хизан са юкъузни тек тарвал туш.

Вири шегьидриз Аллагьдин патай рагьмет, хзанриз сабур тIалабзава чна!

Вакъиф Гьажагъаев