КIвалин хцикай ватандин хва хьана

Аял чIавалай четинвилер, дарвилер акур, Къазахстандин Шевченко шегьерда кьил хкажай гъулгъулаяр себеб яз Ватандиз хтай Вадима буба Шаирахъ галаз гъил-гъиле гана хайи Хуьрелдал бубайрин муг туьхкIуьр хъувунай. Мехъерна, пуд веледдин-кьве рушанни са гададин буба хьайи касди вич цIуз, вацIуз ягъуналди аялар чIехи авуна.

Бубадин зегьметар акур гада Анвера 9-синиф акьалтIарунни “зун Къубадин пеше мектебдиз фида, автослесарвал чирда”-лагьана.  Авай са хцик далу кутунвай Вадима “ваъ” лагьаначир: гьикьван фад кеспи кьуртIа, гьакьван хъсан-фикирнай. Якъин гьа са легьзеда хцин мехъерикайни, дуьнедал къведай хтулрикайни.

Анвер чи, зи вилик чIехи хьайи аял тир. Мектебдин вири мярекатра мукьувай иштиракдай, гьамиша лидер, сад лагьайди жез кIандай. КIелер хъсан ийизвай ихьтин аял пеше мектебдиз фин муаллимрин садан рикIивайни туширтIани, чна разивал ганай.

Вири 19 яш уьумуьр гьалнавай са жавандикай вучар, гьихьтин гафар лугьуз жеда кьван? Чун вири пагь атана амазма. Адакай-мили хесетрин, виридаз гъил кьадай, къал-къилрик квачир, хизандал пара рикI алай и гададикай алатай заманда рахунни, ам амачирдал чалахъни жезвач.

Анвер 2019-йисуз аскервилин буржи тамамриз рекье гьатнавай. Фад-фад зенгердай, бубадивай кIваликай, начагъ вахан везиятдикай, гъвечIи вахан тарсарикай хабарар кьадай, хтайла кьилиз акъудиз канзавай крарикай рахадай.

Октябрдин 31-даз Хуьрелрин хуьр гъамуни кьунвай: хуьруьз къагьриман аскер, шегьид  хквезвай. Инсанрин, машинрин, аскеррин, кIелзавайбурун цIиргъ са шумуд километрдин яргъивиле авай.

Авай са хва квадарнавай буба Вадим Шихалиева вучар чIугвазвайтIа, са бубади хьиз за хъсан кьатIузвай. Анжах ам мягькем акъвазнавай, ажузвалзавачир: хва шегьид хьанвай, Ватан патал женгера чан эцигай агъзурралди жегьилрин жергейрик экечIнавай!

Вахт, заман дарман я,-лугьуда. Вахтуни хер сагъар хъувуртIани, тIал атIайтIани, гел амукьда.

Са хуьрелвиди, Анверан муаллим хьайи интеллигентди хьиз заз чи хуьруьнвийрин мурад, тавакъу мецел гъана вини кьилевайбурув агакьариз канзава: хуьруьн мектебдиз  кьвед лагьай Къарабагъдин дяведа игитвилелди шегьид хьайи Анвер Вадиман хва Шихалиеван тIвар гун!

Им адан хизандин хьиз, чи-вири хуьрелвийринни рикIивай жедай.

Элман Салманов