Хуьруьн, элдин кьил цавузна

Наши, чирвилер зуракI тир са бязибуру къадим Уьнуьгъуьн чилерал хачар алай къванер, дегь кхьинар пайда хьуникай, “Ирид стхадин пIирикай” эсиллагь дуьз тушир баянар гуда, риваятар ахъайда.

Гьакъикъатда Уьнуьгъ Къафкъаз Албаниядин вилаятрикай садан меркез хьанва. И хуьрун цлар къениндалдини амай уьцIенвай къала чи чIехи бубайри эцигнавайди я. И къала-хуьруьн (шегьердин) варар дустариз ахъа- душманриз кIевиди тир.

Чи чилерин виридалайни иер акунар, тIебии хазинаяр авай са пIипI-Къарабагъ пацук кутунвай душман къуншийрини анаг чпинди, къадим Албаниядин тарихдин гуьмбетар тир килисаяр, монастырар чпиз махсусди я,-лугьузвай.

Уьнуьгъа дидедиз хьайи, тай-туьшерихъ галаз къадим къаладин цларин канерик “дяве-дяве” къугьвай Амридаз вичин хуьуруьн, Къарабагъдин тарих, анагар низ махсус ятIа хъсан чизвай. Ада гьеле мектебда кIелдамаз женгчи хьуникай, хайи чилер душмандикай михьуник пай кутуникай фикирарзавай.

Аскервал 2018- йисуз кьилиз акъудай Амрид Юнусов вичин хушуналди Вахтунлай Виниз Къуллугъдай Идарада (МАХИ) акьвазна.

Мотоягъадай кIеретIдин командир тайинар авур Амрид цIийи къуллугъдин чкадани сифте йикъарилай виридан канидаз элкъвена. Вичелай виневайбуруни, вичин гъилик квайбуруни адаз викегь, гафунал мягькем, хъсан чирвилер авай женгчидиз хьиз гьуьрметзавай.

РикIевай мурадрин гьеле сад лагьай кIарцIе авай Амридан уьмуьр Физули шегьер ягъийрикай азад ийизвай женгера кIар хьана.

Чарадан дерт я,-лугьуда. Анжах и дяведин йикъара “чарадан дерт” авачир, вири хуьр, район, уьлкве, миллетар сад хьанвай.

Шегьид Амрид Юнусов кучукзавай къуз Уьнуьгърин хуьре цавуз вегьей къван чилел аватдачир. Амрид саки виридан хва, стха…тир. Абурун арада белкини кIаникай-кIаникай канзавай са рушни авачиз жедачир. Диде Рефиле 25 яш хьанвай хциз сусан суракьда, буба Заур мехъеррин къайгьуйра авай эхир.

…Амридан яракьдин дустари уьунуьгъви командирдин кьегьалвилерикай, аскерриз чешне тир жумартвиликай лагьай гафари дидени буба са кIусни мягьтеларначир: абуруз чпи тербия гайи, и накьвадал чIехи хьайи веледди садрани дуст дарда тан тийидайди, кьулухъ катунилай кьиникь кан кьабулдайди чизвай.

“- Зи хва Ватандин рекье шегьид хьана, – лагьана буба Заура – агъзурралди шегьидрин циргъиник акатуналди, хуьруьн, элдин кьил цавузна.”

Аллагьди рагьметрай, хайибурун рикериз сабур гурай.

«КцIар»