ЦlИЙИ АНСАМБЛ

Хьилар чи районда макьамчийрин, манидаррин хуьр хьиз сейли я. Инай Ашукь Успат, Къвешти Агъабала, Минетуллагь, Нисреддин, Къайинбег, Имамали, Эмруллагь хьтин макьам ягъадай сенятчияр акъатнава. Алай девирдани хуьре ихьтин хъсан тенденция давам жезва, са шумуд хизанда манидал, макьамрал рикI алай жегьилар чIехи жезва.
Ихьтинбурукай садни Исрафиловрин хизан я. Адан кьилевай кас Икрамеддин Мурадан хци сифте юкьван мектеб, ахпа Дербент шегьердавай Харусенятдин Институт акьалтIарна. Диплом къачур жегьил хайи райондиз хтана, ада медениятдин рекьяй чара-чара коллективра кIвалахиз эгечIна. Икрамеддина хайи хуьруьн Медениятдин КIвале кIвалах ийиз-ийиз, “Мел”, “Яран эквер”, “Къайи булах” вокал-инструментал ансамблрани зегьмет чIугуна. Ада исятда “Шагьдагъ”халкьдин коллективдани Хьиларин Медениятдин КIвале кIвалахзава.
Республикада кьиле физвай Хизанрин ансамблриз килигунра Исрафиловрин хизанди са шумудра чи райондин тIварцелай иштиракна, вини чкаяр кьуна. Адан рухвайри бубадин сенят-макьамчивал хкягънава. ЧIехи хци-Алберта синтезатордал макьамар тамамарзава, вичи тешкилнавай “Мурад – студио” халкьдиз къуллугъунин рекьел эцигнава. Кьвед лагьай хва Гьуьрмета Сумгайитдавай Солтан Гьажибегован тIварцихъ галай музыкадин мектебда кIелзава. Ада гьакIни халкьдин мел-мехъеррик, чара-чара концертра манияр лугьузва. Са шумуд югъ вилик Гьуьрмет Исрафилова “Жегьилвилин ван” тIвар алай килигуна гъалиб хьунай чи республикадин Медениятдин Министр Эбуьлфес Къараеван гъилелай “Дамахдин Диплом” къачунва.
И мукьвара чал мад са рикI шадардай са хабар агакьнава: Икрамеддин Исрафилова “Икрам-Ритм” тIвар алай далдамчийрин ансамбл арадал гъанва!
И хабарди чаз гзаф хвеши авуна , “Ютуб”канал ахъайна ансамблдин сифте макьам кхьенвай дискиниз килигна. Баркаллагь хьурай Икрамеддиназ, мадни баркаллагь чIехи зуьрнечи, Азербайжан Республикадин медениятдин лайих авай кIвалахдар Нувиддин Жигероваз, садни далдамар ягъазвай амай гадайриз!
Далдам вири халкьарин хьиз, лезги халкьдинни виридлайни дегь макьамдин алат я. Адал макьам ягъун, сад хьиз ритм кьун гьам четин я, гьамни гзаф гуж серф авун герек къведа.
Чна Икрамеддин Исрафиловаз “Икрам-Ритм” ансамбл мубаракзава, адаз чандин сагъвал, рикIин шадвал, халкьдиз къуллугъ авунин рекье мадни зурба агалкьунар тIалабзава.

Вакъиф Муьшкуьрви