МАНИДИН ТЕАТРДА МАНИ ХЬТИН СА НЯН

Бакуда, Решид Бегьбудован тIварунихъ галай Девлетдин Манидин Театрда шаир, Шарвилидин конкурсдин мукафатчи Гуьлалийрин Эйвазан 50-йисан юбилейдиз талукьарнавай мярекат кьиле фена.

“Раб вегьейтIа аватдай чка авачир”-и гафар и межлисдикайни лугьуз жедай. Залдин кьилел алай балхунрани кIвачел акъваздай чкани амачир.
Мярекатдик гафарин устад Руслан Шейдаеван ванцелди лентиниз къачунвай шаирдин “Агат хъия” тIвар алай шиирдалди ва и чIалариз Маина Абдулмуталибовнади кхьенвай манидин бинедаллаз туькIуьрнавай видеоклипдалди кьил кутуна.
“Самур” Лезги Милли Медениятдин Меркездин патай гаф лагьай профессор Камал Абдуллаеван рахунрилай гуьгъуьниз сегьнедиз юбиляр шаир-Гуьлалийрин Эйваз вич акъатна. Ада “Алам” журналдин кьилин редактор, мярекатдин асул тешкилатчи Къурбаналийрин Камранахъ галаз санал нян аярдакваз кьиле тухвана.
Юбиляр тебрикун паталди сегьнедиз хачмазви муаллим Шихжамал Шихметов, Къебеледин Камарван хуьре уьмуьрзавай муаллим юбилярдин шиирар азербайжан чIалаз элкъуьрнавай шаир Гъериб Гьуьсейнов, “Сувар” ва “Жигитар” ансамблрин регьбер Завир Нежефов, шаирдин студентвилин дуст Салман Абдулов, Эйваз муаллимдин шиирар урус чIалаз элкъуьрнавай Бести Нифтиева, Азербайжандин лайих, Дагъустандин Халкьдин артист, устад сенятчи Ширбет Рзакъулиев, Магьачкъалада акъатзавай “Лезги газетдин” кьилин редактор Мегьамед Ибрагьимов, репер Элшад Лебибов, чи республикада уьмуьрзавай халкьарин чIалар чирна тупIалагъзавай лингвистикадин ижтимаи тешкилат тир “Уьфуькъдин” лезги чIалан групдин регьбер Офеля Яхулова, Чпиррин хуьруьн мектебдин, гьакIни юбилярдин математикадин муаллим хьанвай Шихверди Агъаев, “Марвар” литератур кIватIалдин пун кутурбурукай тир зари Вакъиф Муьшкуьрви, шаирдин рикIин дустар Багьрам Залов, Зиядхан Мурадханов, Оруж Оружов акъатна, юбилярдиз чпин рикIин гафар лагьана.
Манидар Магьире Шириновади шаирдин гафариз вичи кхьенвай “Гуьзел”, халкьдин макьамдал заридин гафар эцигнавай “Лезги руш”, жегьил манидар, Сумгаит шегьердин музыкадин мектебдин студент Гуьрмет Исрафилова шаирдин гафариз Расим Бекерова кхьенвай “Мурад” тIвар алай манияр тамамарна.
“Жигитар” ансамблдин бицIи аялрини Расим Бекерова Эйваз муаллимдин гафариз кхьена Ашукь Адила тамамарзавай “Лезгияр” манидал кьуьлерна.
Юбилярди вичин поэзиядал гьейранбуруз автограф алай ктабар багъишна.
Ваз чандин сагъвал, туькIуьрунрин рекье мадни чIехи агалкьунар тIалабзава чна, Эйваз муаллим!

“КЦIАР”