ЦIИЙИ МУЬКЪУЬ АЛАКЪАЯР МАДНИ ГЕГЬЕНШАРДА

DCIM100MEDIADJI_0012.JPG

Урусатдинни Азербайжандин арадавай сергьятдал Самур вацIун винелай физвай цIийи муьгъ йисан эхирда кардик кутада.

Федерал гьукуматдин “Каспий” рекьерин идарадин пресс-къуллугъди хабар гузва хьи, идарадин рехъ чIугдайбуру гьидроизоляциядинни цIалцIамардай кIвалахар, гьакIни винелай алатна фидай плитадин барйердин каркас кIватIун ва бетон чIугунин кIвалахар гъиле кьунва.
Подратдин тешкилатди къвалан часпар эцигунин ва винел патан ракьун конструкцийриз шир ягъунин крар кьиле тухузва. И мукьвара вахтуналди дамбайрин элкъуьрнавай конструкцияр чукIурунин, гьамни вахтуналди эцигнавай муькъуьнни гьачайрин вахчунин кIвалахар кьилиз акъудна куьтягьда. Алай чIавуз обйектдин 90 % гьазур я. Ам алай йисан декабрдин эхирда кардик кутун фикирда кьунва.
ГьакIни 487 пагон-метрдин яргъивиле авай кьве агатдин чкайрани кIвалахар кьилиз акъудна куьтягьзава: эрчIи пата-Азербайжандин ва чапла пата-Урусатдин.
Урусатдин патай “Нью-Жерси” типдин бетондикай часпар кIватунихъ эгечIнава, гьакIни чилин винелай яхдиз фидайбур патал лифт авай зонадин каркас хкажзава. Ида рекьяй фидайбурун виридан

DCIM100MEDIADJI_0024.JPG

гьерекат хата квачирди ва регьятди ийида.
Обйектдал кIвалахар 2017-йисуз гъиле кьунва. Кьве йисни бегьем тахьанмаз ина винелай алатна фидай плита ва винел патан туькIуьрхьун галкIурна куьтягьнава.
Самур вацIун винел жедай мукъвел физвай кIвалахрин эхирда автотранспортдин кьве хилен гьерекат, гьакIни герек тир чIавуз пудлагьай хелни кардихъ кутаз хьун мумкин жервал я. Муькъуьн яргъивал 325 м, гьяркьуьвал 17,3 м жеда.
И кьве уьлкведизни важиб тир обйект эцигунин разивал 2017-йисан августдин 13-аз Урусатдинни Азербайжандин арада кутIуннавай икьрардалди кьилиз акъатнава. Документда обйектдин харжияр кьве патани сад хьиз чIугвадайди къейд авунва: заказ ганвайди Азербайжандин Девлетдин автомобилдин рекьерин агентлик тирдаз килиг тавуна, Урусатдин гьукуматди харжарин са пай вичин хивез къачунва. И эцигунин вири харжияр санлай 1,3 миллиард рубл я.
КIелзавайбурун рикIел хкинт хьи, цIийи муькъуьн проект чи кцIарви, республикадин лайих авай инженер Натик Алиева регьбервалзавай “Гьидротранспроект” илимдинни-жагъурунрин меркезди гьазурнавайди я. Муьгъ эцигунни чи уьлкведин-“Евраскон” АСЖ-дин пешекарри кьиле тухузва.
И проектди Урусатдинни Азербайжандин арада авай транспортдин алакъаяр мадни хъсанарда, мадаратдин, мал маса гунин-вахчунин алакъайриз генани гегьенш рехъ ахъайда, гьакIни “Самур”- “Яракь Къазмаяр” тIвар алай алатиз фидай пунктунин кIвалах авайдалайни йигинарда. Идани Урусатдай Азербайжандиз, гьакIни Кьибле Къавкъаздин муькуь уьлквейриз парар тухуниз рехъ ахъайда.