Дустар кьилел кIватIна

Фад-фад закай хабар кьадай,
Фагьум хци, акьул дерин,
Ватандин пар кIула авай,
Чан сагъ хьурай зи дустарин!
Октябрдин 5-аз КцIарин Кьилин Ктабханадин залда лезги кхьираг Вакъиф Гьажиагъаеван (Муьшкуьрви) туькIуьрунриз талукьарнавай мярекат кьиле фена.
Межлис “Алам” журналдин редактор Къурбаналийрин Камрана ахъайна. Ахпа ада гаф доклад ийидайбурув гана: Шихжамал Шихметова ” ТуькIуьрунрин 50 йис”, Римма Гьажимурадовади “Вакъиф Муьшкуьрвидин проза”, Абир Тагьирова “Вакъиф Муьшкуьрвидин эсерра тарихдин гелер” темайрай рахана.
Шаир тебрик авун патал адан хтул, Худат шегьердин 3 нумрадин мектебда кIелзавай Тамам Гьажиагъаева, Манкъулидхуьруьн мектебдин аялар тир Хадижа Султалиева, Амир Амиркъулиев, Алмида Оружовани атанвай. Аялри Вакъиф Муьшкуьрвидин шиирар хуралай лагьана.
Гаф къачуна рахай ксари: “Марвар” кIватIалдин кьил Эйваз Гуьлалийрина, “Шагьдагъ” кIватIалдин регьбер Лезги Бегьлула, БДУ-дин доцент, физикадинни математикадин илимрин кандидат Бенямеддин Давудова, зарияр Зерифа Кьасумовади, Билал Адилова, Теране Керимова-Оружовади, Бести Нифтиевади, “Мел” ансамблдин регьбер Хуьземмед Пашаева ва мсб. Вакъиф Муьшкуьрви тебрикна, чпин шиирар кIелна.
Межлисдал гьакIни Къазахстандин Актау шегьердавай лезги медениятдин меркездин векил Юзеф Агьмедханова, хачмазви шаир Беюкагъа Агъади, къубави зари Пирали Руьклиди, Девлетдин КцIарин Лезги Драмтеатрдин актриса Регьила Гьажибеговади, Азербайжандин Муаллимрин Институтдин кьилин муаллим, педагогикадин илимрин кандидат Гьасанбала Мамедова чпин рикIин гафар лагьана.
ЧIагъандин устIар Шагьбаз Гьажимурадова, манидарар Роза Гьажимурадовадини Элвин Мегьамедгьуьсейнова тамамарай макьамрини авазри мярекат мадни чIагайди авуна.
Межлисдин эхирда гаф адан себебкардиз гана. КIватI хьанвайбуруз Виридуьнядин муаллимрин сувар, 10-октябр-лезги чIалан югъ барка авур Вакъиф муаллимди вичин са гьикаяни са шумуд шиир кIелна.