ГьикI я вун, Руслан?

КцIарви вундеркинддин уьмуьрда гьихьтин дегишвилер хьанва?

Кьве йис вилик Азербайжандин КцIар райондай тир вундеркинд гада Руслан Сеферова Урусатдин эфирда физвай “Аламатдин инсанар” (“Удивительные люди”) гунугда математикадай вичин уникал алакьунар къалурнай. Гада гьеле мектебдиз фенвачтIани, ада калкулятордин йигинвилив вичин кьиле гьисабунар ийизвай, регьятдаказ вишдан паяр (фаизар) акъудзавай.
Русланан буба Фуад муаллимди гьа чIавуз чпин мурад чирна лагьанай хьи, хци математика дериндай чирдай мектебда кIелнайтIа, рикIивай жедай, гьайиф хьи ихьтин мектеб КцIара авач. Нагагь, кутугай теклиф хьайитIа, чна чи хва кIелун паталди Бакудизни рекье твадай.
Гьа чIавуз Тегьсил Назирликди вундеркинддин диде-бубадиз аялди математикадин мектебда кIелунин гьакъинда вичин фагьум малумарнай.
“Тегьсил Назирлик пакаманда (гележекда) Руслан Сеферова математикадай агалкьунар къачунин рекье алакьдай вири шартIар туькIуьриз гьазур я,”- лагьай хабар ганай гьа чIавуз пресс-катиб Жесарет Валегьова.
Арадай кьве йис фейидалай кьулухъ вундеркинддин ахпагьан кьисметдикай чна адан буба Фуад Сеферовавай хабар кьуна.
Бубадин гафарай, Руслан са шумуд йикъалай Landau School-диз фида. Адан кIелунин гьакьарни Азербайжандин са ватанвиди чIугвадайвал я.
“Вичин тIвар чинеба амукьна канзавай спонсордиз зи хва телегнугдай акуна, ада КцIар райондин Крар Кьиле Тухудай идарадиз вичин фикир малумарна кьван. Гьа идарадин куьмекдалди чна чун жагъурна. Заха касди чи хци и багьа мектебда кIелуниз куьмек ийидайдан гьакъинда хабардарнава,”-лагьана чаз гададин бубади. -Идахъ галаз сад хьиз чпин хизанни Бакудиз фидайвал я, хълагьна ада. Тегьсил Назирликди вичин патай чи хва 6-7-лагьай синифар акьалтIарайла, винидихъ тIвар кьунвай мектебдиз ракъун хивез къачунвай.
  1new.az
           ***
Чна Руслана сифте чирвилер къачур ва гьакIни Фуад муаллимди кIвалахзавай шегьердин 4-нумрадин мектебдихъ галаз авсият хвена. Анай малумат гайивал Руслана сентябрдин 16-ай Landau School-да чирвилер давамарзава.
“КцIари” Русланаз, Сефероврин хизандиз агалкьунар, мурадар кьилиз акъатун тIалабзава.