ЭЛ САД ХЬАНА-ХУЬРУЬЗ ЯД АКЪУДНА

  И карда абуруз карчи инсан, “Метак” фирмадин регьбер Алик Керимова куьмекдин гъил яргъи авуна.
Мел хуьруьнвияр сад-садав агудзавай, писни-хъсан, цицIидини темпелди чара ийиз жедай, жемятрин арадай халисан лидерар вилик акъуддай мумкинвал гудай чи дегь чIаварин къени адетрикай я.
Гьайиф хьи, гуьгъуьнин йисара пара чкайра ам рикIелай алуднава. Инсанар са тIимил кIеве гьатунни кьве гъил къакъажна кардик экечIунин чкадал шикаятар ийиз, чIехи идарайривай куьмекар кан жез, алаз-алачиз “гьазурдаз назир жез” вердиш хьанва.
Яргунрин “Тегъвер”, “Гунгар” ва “Юкьван” магьлейрин жемятри цикай кьитвал чIугваз азим чIавар тир. Виликра КIуррин вацIай хуьруьз къвезвай хуьлейни гьа вацIай хьиз къур акъатнавай.
Эхирни хуьруьн кьуьзуь-жегьил кIватI хьана чIехи бубайри яд къачур Мучугъ хуьруьн кIаник галай са чешмедин яд трубайралди хуьруьз гъунин икьрардал атана.
Хуьруьн духтур Агъил Исакъов кьиле аваз Расиф Кьасумов, Роберт Азизов, Рефихан Рефиханов ва масадбур акатзавай тешкилат арадал гъана, гьар хизандивай чпелай алакьдай кьадарда пулар кIватIна. Трубаяр къачунин меселедал атайла хуьруьнвияр мад четинвилел расал хьана. 6 агъзур метрдиз мукьва гунг къачун паталди 30 агъзур манатдиз мукьва пул герек къвезвай. И кардани мад гьа хуьруьнви куьмек хьана. “Метак” фирмадин регьбер, вичин пунар Яргундай тир карчи инсан Алик Керимова тек са трубаяр ваъ, герек тир маса зерятар, гьакIни яд акъуддай лап регьят маршрут хкягъдай, хуьруьнвийриз гунгар сад-садахъ галкIуриз чирдай пешекарар ракъунни вичин хивез къачуна.
Июлдин сифтедилай гатIунна жемятар гьар юкъуз мелез акъатна. Чуьллерай, рукарай, рагарай физвай 5, 5 километрдин мензилда хвал эгъуьнна, ина 63 мм.дин диаметрдин полиэтилендин трубаяр кутуна, чешмедин кьилив 20 тон яд кьазвай резервуар эцигна. Сентябрдин юкьвариз дупдуру чешмедин яд хуьруьв агакьна.
Къейд ийин герек я хьи, мад са заха яргунвиди-Зиядхан Бачарова гьа хандакIдай чара гунгар кутуна чпин магьледин цIувад кIвализни кьилди хел акъуднава.
-Вилик кIвалахар пара кума,-лагьана чаз редакциядиз атай яргунви Роберт Азизова-Алик муаллимди яд магьлейриз паюн паталди сад чIехи, муьжуьдни гъвечIи яд пайдай агрегатарни рахкурнава.Чи макьсад кIвалах эхирдиз акъудун, гьар са хизандин гъенел цин крант эцигун я.
Эхь, “Эл сад хьайила дагъ чкадлай юзурда”- лагьанва. Гьеле адал кьван атанвачтIани, яргунвийрилай сад хьана хуьруьз цин хел гъиз, кIевевайбуруз чешне къалуриз алакьанва.

“КцIар”