Билал Адилова поэзиядин фестивалда иштиракна

Чи ватанэгьли гьакIни Урусатдин Кхьирагрин КIватIалдин уьзвуь хкягъна

Дагъустандин Халкьдин шаир Расул Гьамзатов дидедиз хьайи сентябрдин 8-аз Магьачкъаладин Поэзиядин театрда “Лацу дурнайрин йикъар” тIвар алай фестивалдин цIарцIе аваз Урусатдин поэзиядин межлис кьиле фена.
Ам Дагъустандин Кхьирагрин КIватIалдин седри Мегьамед Агьмедова Урусатдин Кхьирагрин КIватIалдин кьил Николай Иванован тебрикдин телеграм кIелуналди ахъайна. Гуьгъуьналлаз ада фестивалдин мугьманриз сегьнедал эверна: “Чун са шумуд югъ я санал алаз, чун сад тир организм хьиз хьанва, чи рикIери сад хьиз ягъун, чна сад хьиз фагьумун, сад хьиз байихун пара важиб месэла я, куьз лагьайтIа, чи Ватандин авай гьал гьа идалай аслу я.”
Урусатдин Кхьирагрин КIватIалдин I катиб Геннади Иванова чи ватанэгьли шаир Билал Адиловазни, даргийрин кхьираг Аминат Абдурашидовадиз Урусатдин Кхьирагрин КIватIалдин членвилин билетар такьдимна. Ахпа ада поэзиядин марафон вичи Дагъустандин дагълариз кхьенвай шиирдалди ахъайна.
“Московский литератор” газетдин редактор Иван Голубничиди, Иван Бунинан тIварцихъ галай мукафатдин лауреат Вячеслав Куприянова, поэзиядай кIватIалдин седри Виктор Кирюшина, “Москва” журналдин кьилин редактор Владислав Артйомова, Кхьирагрин КIватIалдин милли месэлайрай катиб Валери Латынина, “Лацу дурнаяр Москвада” фестивал тешкилай Сергей Соколкина ва масабуру чпин шиирар кIелна.
Мярекатдин иштиракчийри Расул Гьамзатован гуьмбетдал цуьквер эцигна. Сентябрдин 9-аз поэзиядин фестивал шаирдин ватан Хунзахда, гьакIни Гуниб ва Дербентда давам хьана.