Юбилейдин мярекат-шад гьалара

КцIарин Меркездин Ктабханада журналист, кхьираг, драматург, алим Фейруз Беделован 70-йисан юбилейдиз талукьарнавай мярекат кьиле фена.
Юбилейдин мярекат и маканда тешкилунни кьасухдай тушир. Фейруз муаллим чи райондин ТIигьиррин хуьре дидедиз хьанва, ада журналиствилин, кхьирагвилин сифте камарни хайи районда вегьена. Алатай асирдин 80-йисара КцIара кардик хьайи “РикIин гаф” литдернегдин активистрикай сад тир Фейруз Беделова гуьгъунай Бакуда Азербайжандин Девлетдин Университетдин журналистикадин факултет яру дипломдалди акьалтIарна. Ам “Совет кенди” газетда мухбир, шуьбедин муьдуьр, Азербайжанда сифте яз акъатай республикадин лезги газет “Самурдин” сад лагьай редактор, 1993-1994-йисара Бакуда басма хьайи лезгийрин кьилди тир “Алпан” газетдин кьилин редактор хьана.
Мярекатдал юбилярдин студентвилин юлдаш, лайих журналист Видади Севзиханова, шаирар Вакъиф Муьшкуьрвиди ва Фехреддин Оружува Фейруз Беделова журналиствиле, алимвиле, прозада ва драматургияда гъиликнавай агалкьунрикай, чи тарихдин илимдик, эдебиятдик кутунвай зурба паюникай докладар авуна.
Межлис кьиле тухузвай “Алам” журналдин кьилин редактор Къурбаналийрин Камрана редакциядин коллективдин къарардалди юбиляр лайих акунвай “Лезги халкьдин дамах” диплом кIват хьанвайбурун капаралди иесидиз такьдим авуна.
“Самур” Лезги Милли Меркездин идара гьеййетдин седри Имран Рзаева, меркездин идаре гьеййетдин уьзвяр тир Ханлар Айдунбекова ва Дуьнямеддин Аскеровани чпин рикIин гафар лагьана.
Шаирар Зерифа Кьасумовади, Билал Адилова, Лезги Бегьлула, Гуьлалийрин Эйваза, Шихжамал Шихметова, Лацуви Мегьралиди, Магьбубе Агъаевадини юбилярдин туькIуьрунрикай ва гьакIни адахъ галаз галкIай кьисайрикай гаф кудна.
Мярекатдиз Бакудай хтанвай Абир ЭчIехвиди, Худатай атанвай Багьрам Залова, Манкъулидхуьряй тир Оруж Оружова, Девлетдин КцIарин Лезги Драмтеатрдин режиссер Багъир Агьмедова ва гьакIни юбилярдихъ галаз жегьил чIаварилай дуствалзавай Алимирзе Алимирзеева, Абубекир Исаева, Натикь Алиевани алатна фейи йисарин хатиреяр рикIел хкана, юбилярдиз сагъ чан, литературадин, илимдин хилера цIийи агалкьунар тIалабна.
Мярекатди эхирда Фейруз муаллимди ам тешкилайбурулай разивална, вичин туькIуьрунрикай са шумуд чешне кIелна.

“КцIар”