ЯРАН СУВАР-ЧИ РИКIЕРИЗ МАСАН СУВАР

Чи халкьдин виридалайни рикI алай суваррикай сад тир Яран сувар райондин меркезда, гьакIни хуьрера шад гьалара къейд авуна.
Яр чи халкьдин къадим йикъарганда гатфарин сад лагьай варз я. Суварин къени, михьи адетар чна саки са шумуд агъзур йисар я хуьз, несилрилай несилрив агакьариз.
И суварсифте нубатда гатфар алукьунихъ галазни алакъалу я. ГьакI хьайила, шегьердин юкьван майдандал кьиле фейи суварин мярекат иниз Гатфар ханум атуналди гатIунна. Девирдив кьадайвал цIийивал кутуна ам са шумуд йис я, майдандиз лацу машиндаваз гьахьиз.
Гатфар ханума кцIарвийриз сувар барка авуна, жегьилриз суварин цIаяр куькуьрдай тапшуругъ гана. Милли пекер алукIнавай жегьил гадайри кIватI хьанвайбурун гурлу капарик кваз, майдандин юкьвал къулажда тунвай кIарасрик цIай кутуна.
Райондин крар кьилиз акъуддай властдин чIехид Шаир Алхасов кьиле аваз жавабдар къуллугъчияр, районда кардик квай къуллугърин ва ижтимаи тешкилатрин регьберар, жегьилар, аялар зурба гургурдин къерехдиз кIватI хьана.
Райондин регьберди чара-чара тилитрив, хуьрерай атанвай коллективрив агатиз абурун сувар мубаракна, агъсакъалриз, жегьилриз, аялриз чандин сагъвал, шадвал кутадай кIвалахар, генгвилер, агалкьунар, Ватандиз ислягьвал ва мублагьвал тIалабна.
Гургур цавуз хкаж хьайила майдан жегьилрин- кьуьлерзавайбурун, манияр лугьузвайбурун, пагьливанрин, гужар синемишзавайбурун, хъуьруьнардайбурун ихтиярда гьатна.
ЦIинин Яран суварин са “кьетIенвални” иниз квасадихъ галаз санал КцIара сифте яз, чи фолклордин персонаж тушир гачални илифун хьана.
Райондин ва хуьрерин манидарри суварин иштиракчийриз рикIелай тефидай легьзеяр бахшна.
Инсанри гьакIни милли хуьрекар алай суфрайрин тIямрин дадарни хкудна.
Чара-чара хуьрерай атанвай спортсменри гирар хкажунай, гъилин гужар синегъдай акъудунай, гьакIни цIил ялунай акъажунар тухуна, гъалибри бахшишар къачуна.
Яран суварин шадвилер яргъалди давам хьана.