Чи тIебиатдин экуь, чими, мили навар

Халис сеняткаррин къилихар виринра гьа са жуьре я: чпикай тIимил рахада (я гьич рахадач), тарифар кьабулдач, чеб масадбурулай вине кьадач, аксина, сенятдин дустарикай, муаллимрикай захадаказ, разивилелди гафарда.
Чаз и мукьваралди Идрис муаллимдин “гъвечIи суас” хьиз чизвай, яргъал Урусатдай хтайла регъуьз-регъуьз салам гана алатдай и къумрал, рикIиз чими руш, налугьумир гегьенш къенпатан алемдин иеси, туькIуьрунрин ашкъи ва алакьунар авай сеняткар-чIугвар я кьван!
Алатай гатуз КцIариз хтайла Айтен уьмуьрдин юлдаш Рауфни галаз чаз мугьман хьана. Чи цлаллай пейзаждилай вил алуд тийиз акурди, завай акъвазиз хьанач:
-Рагьмет хьайи Дарвин муаллимдин савкьат я,-тIварни “Этибаран сала-марфадилай вилик”!
Айтена а пейзаж са шиир хьиз кIелна чаз, адан икьван гагьди за кьатIун тавунвай аламатарни ахъайна: рангарин, наварин сад-садахъ галаз алакъадикай, ацIанвай циферикай, са герендилай къвадай марфадикай…
Рауфавай эхиз хьанач ва зарафатдив:
-Идазни сенят жагъана! Бес квез чизвачни, художник я ман…
Чна са хейлин ихтилатарна: сенятдикай, эдебиятдикай, яргъаравай ватанэгьлийрикай, абуру кIвал-югъ туькIуьрун, хизан хуьн патал гъурбатда тухузвай, гафунин асул манада, женгиникай…
Абурухъ кьве руш ава: Фарида ва Эмилия. Фаридади чкадин девлетдин университетдин 4 лагьай, Эмилияди техники университетдин 3 лагьай курсуна кIелзава.
КцIара Шерифоврин хизанда дидедиз хьайи Айтена Бакуда Азим Азимзадедин тIварунихъ галай Художниквилин Техникум акьалтIарнава. Хизан туькIуьрна уьмуьрдин юлдашдихъ галаз Твер шегьердиз акъатай руша, рикI алай кеспи гадарнач. Аксина, адахъ мадни кIевелай галкIана, чирвилер артухарна: чкадин АРТ (академия рынка и труда) акьалтIарна интерйердин дизайн ва графикани чирна, талукь дипломни къачуна.
Айтен Шейдаева (Шерифова) уьмуьрзавай шегьерда тIвар-ван акъуднавай, эсерриз зурба сеняткарри къимет ганвай чIугваррикай сад я. Рангкарвиле адан эсеррин жанрияр пейзажар, натуьрмортар, витражар… я.
Жегьилри Урусатдиз-Твер шегьердиз хъфин патал рекье гьатдайла мадни чал кьил чIуг хъувуна. Айтена февралдиз и шегьерда вичин эсерарни къалурдай серги тешкил жедайди лагьана.
И серги-ярмаркадикай фейсбукда гегьенш хабарар авазва. Мукьвара зи тIалабуналди Айтена чаз адакай малумат ва са хейлин шикилар ракъурна.
Твердин лап чIехибурукай сад тир Советск проспектдавай галереяда ахъа хьанвай сергида яхцIурни цIудаз мукьва чIугвардин чара-чара жанррин эсерар къалурзава ва гьакIни маса гузва.
Ина Айтенан чи тIебиат хьиз экуь, чими таблоярни ава:такабур Шагьдагъ, сумаг акайнавай хьтин яйлахар, цуькверивди диганвай гуьнеяр, камар, Апшерондин хуьрер, къадим Баку…Са гафуналди вич къарих тир, датIана дарих тир Ватандин акунар, мензераяр!
Ви агалкьунар мадни пара хьурай, ваз, ви уьмуьрдин виридалайни багьа эсерар тир рушариз дишегьлийрин сувар мубаракрай, кцIарвидин руш!

Видади