ЧIАЛАН СУВАР-РИКIИН СУВАР!

Харуcенятдин мектебдин ижласдин залда 21-Феврал Виридуьнядин Халкьарин Дидед ЧIалан Йикъаз талукь мярекат кьиле фена.

Мярекатдал рахай райондин тегьсилдин шуьбедин муьдир Нифтали Ферзалиева аялариз хайи чIаларин сувар тир и югъ барка авуна, ам арадал атунин тарихдикай, гьар инсанди вичин дидедин чIалаз икрам авунин, ам чирна вилин нини хьиз хуьнун важибвиликай, чи уьлкведа чара-чара халкьарин дидед чIалар вилик тухун патал туькIуьрнавай шартIарикий бягьс авуна:-1999-йисуз и вакъиа рикIел хкана. 1999-йисан 17-ноябрдиз ЮНЕСКО-ди вичин кьилин конференциядал 21-феврал виридуьняда хайи чIалан югъ къейд авун къарардиз къачуна. 2000-йисалай кьил кутуна гьар йисан 21-февраль дуьнядин агьалийри сувар хьиз кьиле тухузва. 2000-йис лагьайтIа, дуьнядин тарихда хайи чIалан йис хьиз гьатна. И фактари субутзавайвал, гьар са халкьдиз вичин дидед чIал багьани я, играмини.
Жуван халкьдал, адан чIалал дамахзавай инсанар патал къенин югъ зурба сувар я, -лагьана ада- Гьар йисан 1-Август Азербайжанда милли алфавитдинни чIалан сувар хьиз къейд ийизва. 2002-йисуз чи уьлкведин Евлах ва Мингечевир шегьерра “Дидед чIал” тIвар ганвай гуьмбетар ахъа авунва.
Чара-чара мектебрин шагирдри Азербайжан, лезги, урус ва ингилис чIаларал шиирар лагьана, чпи девлетдин чIал хъсандаказ чирзавай хьиз, дидед чIалавни къайгъударвилив, веледвилив эгечIзавайди, къецепатан чIаларизни майилвал авайди субутна.
Райондин тегьсилдин шуьбедин муьдир Нифтали Ферзалиева мектебра кьиле тухванвай “Литературадин билижияр” тIвар алай кхьинрин конкурсдин нетижайрикай рахана, лап хъсанбуруз фехри ферманар ва бахшишар гана.