ГЬАР ЙИСУЗ “ЭМИНАН ПОЭЗИЯДИН ЮГЪ”

Чи халкьдин виридалайни рикI алай шаир Етим Эминан 180-йисан юбилейдин мярекат поэзиядинни музыкадин сувариз элкъвена.

Алатай йисуз ччара-ччара шегьерра, хуьрера лезги литературадин классик Етим Эмин дидедиз хьайидалай инихъ 180 йис тамам хьуниз талукь межлисар кьиле фена. Етим Эмин вичин уьмуьрда Дагъустанда хьиз Азербайжандани машгьур, кани хьана. А канивал къенин юкъузни ама, гьамишани амукьда, мадни деринди жеда.
Рекье кутур йисан 22-декабрдиз КцIарин меркездин ктабханадин чIехи залда чи халкьдин виридалайни рикI алай шаир Етим Эминан юбилейдин мярекат кьиле фена.
ЧIехи Эминан поэзиядин экуьнал Бакудай, Къубадай, Хачмазай, КцIарай, Актаудай… мугьманар-шаирдин ирсинал, дидед чIалал рикI алай ксар агатнавай.
Юбилейдин мярекат “Алам” журналдин кьилин редактор Къурбаналийрин Камрана кьиле тухвана. Ада шаирдин ирсинихъ галаз таниш хьунин тарихдикай, гьеле студент чIавуз кIвале тек са лезги ктаб тир “Дуьня гьей” кIелиз тахьуникай, регъуьвилин гьиссери вич гьарфер, гафар, чIал чируниз мажбурайдакай ихтилатна. -Къенин йикъалди авай малуматриз килигайла, Етим Эмин сифте яз араб алфавитдин гьарфаралди лезги чIалалди шиирар кхьенвай шаир я,-къейдна ада- гьакI хьайила адаз чна «лезги поэзиядин буба» лугьузва.
Шаир-таржумачи Вакъиф Муьшкуьрвиди Етим Эминан уьмуьрдин рекьикай ва туькIуьрунрикай генгьенш доклад авуна. Ада гележегдин шаир а чIаван къазидин, гьар жуьредин мумкинвилер авай са хизанда дидедиз хьуникай, хъсан чирвилер къачуникай, анжах “Етим” тахаллус къачуна вири дуьньядин етимрин къайгъу чIугуникай, гьакIни шаирдин муьгьубатдин, сияси лирикадин кьетIенвилерикайни рахана.
“КцIар” газетдин кьилин редактор, Лайих тир журналист Видади Севзиханова а девирдин Азербайжан поэзияди, кьилди Видадидин, Вагифан къушмайри, хци, девирдин зидвилериз, накъисвилериз акси кхьенвай муьхеммесри Етим Эминан туькIуьрунриз таъсируникай, шаирди Ширвандин шииррин межлисра, гьакIни Яргундал и хуьруьн маарифчийри арадал гъайи дернегра иштирак авуникай делилар авайди къейдна.
Ада гьакIни кIватI хьанвайбуруз виридан рикIяй хьайи теклифарни гана:-гьар йисуз “Эминан поэзиядин югъ” кьиле тухун; гьар вацран межлис са шаирдин, бестечидин, кхьирагдин туькIуьрунриз талукьарун.
Шаирар- “Шагьдагъ” эдеби кIватIалдин регьбер Лезги Бегьлула, Сеидмет Самуриди, Зерифа Кьасумовади, Римма Гьажимурадовади, Мегьрали Лацувиди, Къазахстандин Актау шегьердин Лезги Меденият Меркездин векил Юзеф Агьмедханова, Шихжамал Шихжамалова, Зиядхан Мурадханова, Бегьрам Залова, Судя Манчарова, Гьасанбала Мамедова,Оруж Оружова, Жавид Тагьирова, Жавид Алисманова, Камран ТIигьиржалвиди, Баба Салманова, Давудрин Равила, Девлетдин КцIарин Лезги Драм Театрдин актриса Кифает Юсифовади, “Уьфуькь-С”-дин кIвалахдар Офеля Яхуловади чпин рикIин гафар лагьана. Абуру Етим Эмин чи милли поэзиядин классик, лезги эдеби чIалан бине эцигайбурукай сад, гьакIни гьахъвилин ва муьгьуьббатдин, вичин хайи халкь бахтавар хьунин рекье ччан цигай къагьриман хьайидини къейдна.
Лезги шаиррин кхьинар урус чIалаз элкъуьрзавай, абур иер дикциядив гьам хайи, гьам урус чIаларал устадвилелди кIелзавай, интернетдин сайтара эцигна дуьнядиз чирзавай Бести Нифтиевади межлисдин иштиракчияр вичин алакьунралди мадни гьейранарна. Бести ханума Эминан урус ва лезги чIаларал ифа авур “Веси” шиир, и цIарарин авторди Мегьамед Физулидин Азербайжан ва Эминан таржума яз лезги чIалал кIелай гъезел мярекатдин иштиракчийри хушвилелди кьабулна.
“Алам” журналдин жавабдар катиб, журналис-этнограф Абир ЭчIехвиди вичиз Гьаким Къурбанан “Дили дуьнядин чирагъ” романдай, Гьаким Къурбанан вилерай Эминан халис къамат аквазвайди лагьана, гьавиляй и зурба романди чи эдебиятдин тарихда вичин лайих чка кьунал чIалахъ тирди къейдна.
Манкъулид хуьруьн юкьван мектебдин кIелзавайбуру-, Симара Оружовади (7-синиф), Нане Несировади (6-синиф), Хадижа Султалиевади (1-синиф) Эминан шиирар хуралай кIелна.
Машгьур чIагъанчи Расим Бакарован регьбервилик кваз “Кард” ансамблди, Ашукь Адила, Вуькъар Мамедрзаева, Явер Шалбузова ва Роза Гьажимурадовади чпин Етим Эминан гафариз кхьенвай манияр чIехи ашкъидив ва устадвилив тамамаруналди мярекатдиз экв гъана, дад гана.
Са гафуналди, пара иер манидинни шиирдин сувар хьиз фена Эминан юбилей. Шаирдин ирс, уьмуьрдин рехъ, адан чIалариз теснифнавай манияр, адаз бахшнавай шиирар, чара-чара инсанрин Эминакай веревирдер…вири санал иер са кIунчI хьиз юкьвал атана.
Мярекатдин кьвед лагьай пай, ктабханадин гъвечIи залда и вакъиада атIун паталди гьазурнавай торт ва чай алай элеъвей столдихъ ихтилатралди давам хьана. Межлисдин иштиракчийрин тIварцелай рахай Къурбаналийрин Камрана чеб рикIин ахъавилелди кьабулай “кIвалин сагьибриз”, директор Загьир Мустафаеваз, атайбуруз, тедбир арадал атунихъ къуьн кутурбуруз разивал малумарна.

Гуьлалийрин Эйваз,
шаир, Шарвилидин тIварунихъ
мукафатдин лауреат