ЧИ МЕДЕНИЯТДИН МАКАНАР РЕГИОНДА СИФТЕБУР ГЬИСАБНА

Хачмазин Региондин Медениятдин Идарада йисан нетижаяр веревирддин гегьенш ижлас кьиле фена.

Анал рахай идарадин реис Назим Агъаева йисан къене региондик акатзавай районрин медениятдин маканра кьиле тухвай серенжемриз мад садра вил вегьин хъувуна. “Буьлгейрай-буьлгейриз”, “Буьлгедин тIуьнар” хьтин зурба проектар кьилиз акъуднавайди, театрдин, музыкадин коллективар мукьвал-яргъал хуьрера, шегьерра гостролра хьанвайди, ктабханайрин коллективри цIийивилер авунвайди разивилелди къейдна.
Реисди чпин кIвалахар йикъан тIалабунрив кьадайвал тешкилнавай, жемятдиз медени къуллугъ къалурунин цIийи форма ва методрикай алакьуналди менфят къачузвай коллективрин арада лап хъсанбур ашкар хьанвайдини малумарна.
Йисан нетижайриз килигна идарадин КцIар райондин векилвал (векил Давид Ибрамхалилов), “Йисан векилвал”, КцIарин Девлетдин Шикилрин Галерея (директор Нермине Салманова), “Йисан галерея”, КцIарин Меркездин Ктабхана (директор Загьир Мустафаев) “Йисан ктабхана”, КцIарин Аялрин Харусенятдин Мектеб (директор Рейгьан Багъишева) “Йисан харусенятдин мектеб” номинацийра лап хъсанбур гьисабна талукь фехри ферманриз лайих акуна.
Чна гъалиб медениятдин маканрин коллективар тебрикна абуруз бахшишар мубаракрай лугьузва, кам вегьенвай йиса мадни чIехи агалкьунар гъилихъ авун мурадзава.