Халкьдин сеняткардин юбилей къейдна

КцIар. Тек чи районда ваъ, адалай къерехрани вичиз халкьдин арада “Нуви” лугьузвай Нувиддин Фейзидин хва Жигеров течидай музыкадал, иллаки зуьрнедин авазрал рикI алайди якьун четин я. Ада мехъерар ягъана кIвал-югъ кутур, хизан туькIуьрайбур къе чIехи бубаяр, бадеяр ятIани, жегьилриз къенин юкъузни чпин шадвилин мярекатра “Нуви халуди” иштиракна, гьич тахьайтIа зуьрнедал са “Кавха” ягъана канзава. Нувиддин Жигерова садан кефини хазвач, “жезвач, яшар фенва”-лугьузвач, чIехи бубадилай аламай къадим зуьрне гилан, моддин кьватида эцигна мехъерик фин паталди кIвачин жезва.
Ада музыкадин рекьяй сифте чирвилер хизанда-хайи ТIигьиррин хуьре къачуна, гуьгъуьналлаз талукь мектеб акьалтIарна дипломдин иесини хьана. Жегьил йисар чи районда сад тир Самур поселокда акъатай сеняткарди ина клубдин муьдир, халкьдин туькIуьрунрин кIвале методист кIвалахна. Нувиддин Жигерова арадал гъайи “Шагьнабат” ансамблди 1991-йисуз “Халкьдин коллектив” тIвар къачуна.
Алатай йисарин и ва маса рикIел хкунар, уьмуьрдин верцIи легьзеяр тIвар-ван авай сеняткардин 70 йисан юбилейдин мярекатдал гаф къачуна рахайбуру мадни мецел хкана.
Райондин медениятдин лап чIехи макан тир Девлетдин КцIарин Лезги Драм Театрда кьил кьур и межлисдал рахай Хачмазин Региондин Медениятдин Идарадин КцIарин векил Давид Ибрамхалилова Нувиддин Жигерован гзаф сеняткардиз чешне къалуриз жедай уьмуьрдин ва туькIуьрунрин рекьикай ихтилатна:
-Нувиддин асул халкьдин сеняткар я,-лагьана Давид муаллимди,- адан музакада чи халкьдин къагьриманвилин, зегьметдин, шад мярекатрин, фолклордин мотиври кьилин чка кьунва. Ам шумудни садра виликан СССР-дин, республикадин, Туьркиеда кьиле фейи виридуьнядин фестивалрин лауреат хьана, 1914-йисуз уьлкведин башчидин серенжемдалди адаз Азербайжан Республикадин “Медениятдин лайих кIвалахдар” тIвар гана.
Шад гьалара кьиле фейи юбилейдин мярекатда гьам юбилярди вичи, гьакIни адан шагирдар хьайи манидарри тамамарай авазри, манийри, кьуьлердай макьамри кIватI хьанвайбуруз рикIелай тефидай легьзеяр бахшна.

“КцIар”