Халкьдин сеняткардин юбилей къейдна

Манкъулидхуьр. Фадлай манидинни поэзиядин са иер межлисдихъ цIигел тир хуьруьнвияр медениятдин кIвалин залди кьазвачир:ам сиве-сивди ацIанвай, азим ксари кIвачин кьилел акъвазна килигзавай сегьнеда физвай вакъиайриз.
Халкьдин сеняткар Физеммед Куругълиеван I00-йисан юбилейдин мярекатдиз Бакудай, Худатай, КцIарай, Хачмазай, гьакIни Чпир, Лечет, ГуьндуьзкIеле, Хьил, ПIитIишкIеле, Агъа Лакар хуьрерай мугьманар атанвай.
Манидардин туькIуьрунрин экуьнал илифнавайбуруз куьн атуй, рагъ атуй лагьай хуьруьн крар кьилиз акъуддай идарадин векил Абдурагьман Манатилова элдин сеняткар рикIел хкана ихьтин мярекатдал кIукI гъанвайбурулай разивална, манийринни поэзиядин межлисрин гуьгъни хъжедайдахъ умуд галайдини лагьана.
Мярекатдин тешкилатчи ва ам кьиле тухузвай Уруж Уружова гаф хуьруьн мектебдин сад лагьай синифда кIелзавай Хедижа Султалиевадиз гана. ГъвечIи руша хуралай лагьай шаир Медет Эрзиманован “Манкъулидхуьр” шиирдалди поэзиядинни авазрин няник кьил кутуна.
Шаир Вакъиф Муьшкуьрвиди Физеммед Куругълиеван уьмуьрдин ва туькIуьрунрин рекьикай, шаирдин туькьуьл кьисметдикай ихтилат кудна. Жегьил хва Мегьамед сура турдалай кьулухъ:
Чаз сурара са сур атIутI,
Куьлуь къван квай гуьнедикай.
Масан бала сура туна,
Зи пай атIуй дуьнядикай-лагьана бендер лугьуз эгечIай Физеммеда рекьидалди чуьнгуьр, тар ягъана, манийралди, авазралди вичин рикIини сабур гана, жемятрин межлисрални ван, абур гъана.
“Алам” журналдин кьилин редактор Камран Аламвиди, журналист-этнограф Абир Тагьирова, шаир Эйваз Гуьлалиева чипин рикIин гафар лагьана, шиирар кIелна.
Хуьруьн клубдин муьдир Элвин Магьамедгьуьсейнова гьазурнавай манийрикай ва сегьнейрикай ибарат програм виридан рикIивай хьана. “Сувар” ансамблдин манидаррикай тир Роза Гьажимурадовади Физеммеда туькIуьрнавай, гилани халкьдин сивера амай “Къайибалид лацу Туйгъун” манидивди килигзавайбурун хиялар, налугьуди, ХХ виш йисарин сифте кьилериз-стахановчийрин гьерекат машгьур тир чIавариз тухвана:
Барабандал цуьл гузавай,
Я руш, ви чан юргъун яни?
Стахановчи тIвар къачурди,
Къайибалид Туйгъун яни?
Мектебдин аялри чпи кIелай шиирривди Етим Эминан, Кесиб Абдуллагьан, Микаил Муьшфикьан, Забит Ризванован, Медет Эрзиманован руьгьерни саки и межлисдал хкана.
Гуьнай Велихановади, Гьуьрмет Исрафилова, Элвин Мегьамедгьуьсейнова, ашукь Нуьсретан хтул Нуьсрета, кларнетдин устIар Фейзуллагь Хаметова тамамарай манийри ва макьамри инсанрин гуьгьуьлар шадарна.
Межлисда Физеммед Куругълиеван мукьва-кьилийрини иштиракзавай. Абуру манидардикай чпин рикIел хкунар авуна, бубадин хатурдай и мярекат тешкилуниз куьмек гайи ксарилай разивална.
Мярекатдин эхирда хуьруьн гьевескар артистри Физеммед Куругълиеван уьмуьрдикай рахазвай са пердедин тамаша къалурна.
Жемятди мярекат хъсан кьиле фин патал зегьметар къачур Уруж Уружоваз ва Сария Ярметовадиз кьилди алхишарна.

Римма Гьажимурадова