Айфон пишкеш къачур рушакай фотограф хьана

Шегьердин шикилрин галереяда цийи экспозиция
Алай чIавуз гъиле телефон авачир аял, жегьил акван четин кар я. Гаф жузурла вил айфондалай алуд тавуна ваз кьилив жавабар гуда, гагь хъуьреда, гагь хъелер атана чин чIурда абуру…
Анжах чаз ихтилатиз канзавай дуьшуьшда акI туш. КцIарви руш Жаледи вичиз багърийрин бахшиш тир айфондикай алакъадин, информация агакьарунин ва гъилик авунин мумкинвилер хьиз, шикилар, мензереяр чIугунизни менфят къачузва.
Эхь, шегьердин 3 нумрадин мектебдин 11 синифда кIелзавай Жале Къедимова айфондин иеси хьайидалай кьулухъ халис фотогьевескардиз элкъвенва.
Адан телефондин объектив элкъвезвай маканар лагьайтIа, чи тIебият, фокус кьазвай чкаяр хайи, сувар, вацIар рагар, рукар, уьруьшар, цуькIвер, гьайванар, булахар… я.
7-сентябрдиз КцIарин Девлетдин Шикилрин Галереяда Жаледин “ТIебиатдин легьзеяр” тIвар алай кьилди серги ахъа хьана. Экспозицияда гьевескар фотографдин рангунинбур тир 52 шикил куьрсарнавай.
Серги ахъа авунин мярекатда райондин крар кьилиз акъуддай властдин, рагиондин културадин идарадин, чара-чара идарайрин векилри иштиракна.
Серги октябрдин вацралди давам жеда.

“КцIар”