Къванцел кхьейбур квахьда, чарцел кхьейбур ваъ!

“Ктабар-кIвалериз” проект хуьрерани давамзава.
Ктаб инсаниятдин виридалайни чIехи туькIуьрун, асиррилай инихъ гьар несилди цIийи несилрив ахгакьарзавай аманат, эменни я. Сифте гьарфар, ахпа гафар, гуьгъуьналлаз жуьмлеяр туькIуьрна кхьинар, ктабар арадал гъана камал авай инсанри. ГьакIни и ирс квахь тавун паталди азаб-азиятриз дурум гана абуру. Гьа икI, чав виш ваъ, агъзур йисар идалай виликан тарих, эдебият, дин… хьтин руьгьдин эменнияр ахгакьна.
Къенин юкъуз ктаб интернетдалди, электрондин хабардин такьатралди эвез ийиз канзава. Им жедай кар яни? ЧIехи несилдиз ихьтин гьал арадал атунал чIалахъ жез канзавач, абуруз кагъаздал, чарарал кхьена хъереда кутунвай такьат-ктаб виридалай багьа я.
Са шумуд вахт я, меркездин ктабханадин, адан филиалрин кIвалахдарри яшар авай несилрин тIалабунар фикирда кьуна “Ктабар-кIвалериз” проект кардик кутунва.
Шикилда квез ТIигьир хуьруьн ктабханадин кIвалахдарар хуьруьн рехецрикай тир Рафи Беделован хизандал илифнавай бере аквазва. Ина мугьман хьайи чIавуз ктабханачи Наргиле Исмихановади хизандин чIехи-гъвечIибур цIийи ктабрихъ галаз танишарна, кьуьзуьбуруз чпин рикI алай ктабрай чIукар кIелна.
Ктабханачийри ихьтин гуьруьшар маса хуьрерани кьиле тухузва “КцIар”