Сенятдин суьгьуьрдик кутазва

КцIарин Девлетдин Шикилрин Галереяда чи кьве жегьил художникдин-Хеяле
Беделова ва Велиюлла Зейналован эсеррикай ибарат выставка ахъа хьана.
Выставка ахъа авунин мярекатда региондин културадин идарадин началник Назим Агъаева, идарадин КцIар райондин векил Давид Ибрамхалилова, галереядин директор Нермине Салмановади иштиракна.
Хеяле Беделова шазан йисуз вичин мураддин гелеваз лув гана Бакудин Художниквилин Академиядик экечIнава. Велиюлла Зейналова кIелер шегьердин 2-нумрадин мектебда давамарзава.
Абурун кьведан тематикани са-садаз ухшар я: хайи Ватан, адан мублагь накьвар, иер тIебиат, кьакьан сувар, гур вацIар, багъри инсанар, абурун характеррин штрихар…
Хеяледин таблойра са битаввал, новаторвал, чIугвардивай чими, къайи, миливилин рангаррикайни, талукь хъенерикай менфят къачуз алакьзавайди кьатIуз жезва. Адан “Гьуьлуьн къере”, “Балеринаяр”, “Натуьрморт” ва маса эсерар килигзавайбур фикируниз мажбурдай, хиялриз желбдайбур я. Идани чи ватанэгьлиди кIелзавай академияда дерин чирвилер къачуз алахъзавайди субутзава.
Велиюлла лагьайтIа, сенятдин геле гьеле цIийиз гьахьнава. ЯтIани жегьил гада чIехи камарив вилик физва. Тарсарилай кьулухъ КцIарин Девлетдин Шикилрин Галереядин кьилив галай карханада чи тIвар-ван авай чIугвар Руьстем Нагъиевавай и сенятдин сирер чирзавай Велиюллагьа артух са шумуд конкурсда иштиракна лайих тир чкаярни кьунва. Адан “Натуьрморт”, “Композиция”, “Бубадин протрет”, “ЦIуру муьгъ” ва маса таблояр, пейзажар марагълубур я.
-Зи къаст пешекар художник хуьн я, -лугьузва Велиюллагьа- мектеб акьалтIарайдалай кьулухъ Бакудин Азим Азимзадедин тIварунихъ галай коллеждик экечIиз канзава. Гьеле жуван сифте устад тир Руьстем муаллимдивай чирвилер къачузва.
Гатун каникулриз хуьруьз-хайи муг тир Балакъусардиз хтанвай Хеяледизни вахт бекар акъуддай фикир авач. Адахъ тебиатдин къужахда жедай, мензереяр, таблояр кетендал натурадай куьчардай, хуьруьн инсанрин портретар кIвалахдай мурад ава.
Выставка ахъа авур юкъуз кьве жегьилдизни Хачмазин Региондин Културадин Идарадин грамотаяр ва бахшишар гана.
Выставкадиз атанвай сейрчийри чара-чара таблойрин вилик кIвач хуьзва, са-садан япал гафарзава, таниш мензераяр, суьжетар акурла абурувай гьейранвал, хвешивал хуьз жезвач. Сенятдин аламатдин кар хьун, винизвал, суьгьуьрни гьа им я.
Чна жегьилриз туькIуьрунрин рекье чIехи агалкьунар тIалабзава.

Кемале