Халкьар са-садав агудзавай мярекат

Ахцегьа “Шарвили” эпосдин 19-гъилердин сувар шад гьалара кьиле фена.

Гьар йисуз къадим Ахцегьа кьиле физвай лезги халкьдин къагьриманвилин «Шарвили» эпосдин сувар мадни халкьар са-садав агудзавай сувариз элкъвенва. Ана Кьиблепатан Дагъустандин районрин инсанри, Азербайжандай атанвай чIехи делегацияди гурлудаказ иштиракна.

Адет тирвал, гьар са районди Ахцегьин кьилин куьчейра и юкъуз кьилдин шад майданар тешкилна, жуьреба-жуьре экспонатар къалурзавай, мили макьамарни манияр тамамарзавай, суфраяр ахъайнавай. Кьилди къачуртIа, Ахцегь, Докъузпара, СтIал Сулейманан, Хив, Кьурагь, Агъул, Табасаран, Дахадаеван районри, Дербент шегьерди, Лезги театрдин коллективди кьилдин майданар туькIуьрнавай.

Фикир желбдай жуьреба-жуьре вакъиайрив ацlанвай суварин сергьятра аваз спортдин са шумуд жуьредай акъажунарни кьиле фена.

Майданрал концертар гайидалай кьулухъ вири мугьманар Валентин Эмирован тIварунихъ галай паркуна кIватI хьана. ЧIехи концерт эгечIдалди «Шарвили» суварин тешкилатчи Имам Яралиева,  Дагъустан Республикадин гьукуматдин седрдин сад лагьай мавин Анатолий Къарибова ва масабуру вири мугьманриз сувар мубаракна.

Суварин сергьятра аваз гьар йисуз хьиз «Шарвили» премияр ам лайих акунвай ксариз мадни мярекатдин тешкилатчи Имам Яралиева текьдимна.

ЦIинин йисуз и премиядин сагьибар чпи милли медениятдик, журналистикадик, спортдик чIехи пай кутур векилар тир шаир, гзаф йисара «Дагъустандин дишегьли» журналдин редактор хьайи Пакизат Фатуллаева, «Дагъустан» ГТРК-дин радиодин лезги редакциядин кьилин редактор Наира Рамазанова, «Дагъустан» ГТРК-дин лезги редакциядин редактор Нарима Жамалова, Дагъустандин халкьдин писател, «Самур» журналдин редактор Абдуселим Исмаилов, машгьур журналист Абдулафис Исмаилов, Бакуда акъатзавай “Алам” журналдин кьилив кардик галай  “Марвар” литератур кIватIалдин регьбер, сейли шаир Эйваз Гуьлалиев, дуьнядин ва Европадин чемпион, дзюдочи Телман Къурбанов хьана.

Суварин шад мярекатар яргъалди давам хьана.