Юбилейдиз чIехи концерт бахшна

КцIарин Аялрин Харусенятдин Мектебда чирвилерин йисан екунриз талукьарнавай цIинин концерт Азербайжандин Халкьдин Жуьмгьурият арадал атунин 100-йисаз бахшна.
Концертдик кьил кутадайдилай вилик и сенятдин макандин директор Рейгьан Багъишовади аялринни муаллимрин агалкьунрикай гаф кудна, кIелунрин йиса тафаватдинди хьанвай, гьакIни чара-чара конкурсра гъалибвал гъиликнавай лауреатриз грамотаяр ва бахшишар гана. Гьа икI, Къара Къараеван 100 йисан юбилейдиз талукь яз кьиле фейи республикадин фестивалда Айтен Муьслуьмовади (скрипка) III дережадин диплом, Эдгар Бедирханова, муаллим Седа- къет Сеферовади ва концертмейстр Айтен Сеферовади фехри ферманар къачуна.
Културадин регионал идарадин КцIар райондин векил Давид Ибрамхалилова ва сенятдин макандин директор Рейгьан Багъишовади чирвилера тафаватвал къалурай аялрин чIехи са кIеретдиз мектебдин фехри ферманар ва дипломар гана.
Ахпа хорди Азербайжандин Халкьдин Жуьмгьурият арадал атунин 100-йисаз бахшнавай концертдик кьил кутуна. Харусенятдин мектебдин муаллимрикай ва шагирдрикай туькIвенвай коллективди тамамарай дуьнядин ва гьакIни Азербайжандин композиторрин эсерар сиве-сивди ацIанвай залда ацукьнавайбурун лап рикIивай хьана.
Хорди ифа авур “Уьреклерде йашайырсан”, оркестрдин ифада Къара Къараеван “Марш”, Элвин Бабаева гармондал тамамарай “Эгьсени” ма- кьам, Алиса Мегьсимовади лагьай “Баяти Шираз” ва Гуьнай Велихановадин ифада “Баяти Куьрд” мугъамар, Албина Амрагьовади ва Арзу Шагьбазовади тамамарай Тофикь Къулиеван “Прелуьд” эсер, чара-чара халкьдин манияр, гьакIни аялри ва абурун муаллимри ифа авур музыкадин эсерар кIватI хьанвайбуру чIехи марагъдив ва гурлу капарив къаршиламишна.
ГъвечIи далдамчийри “Азербайжандин ритмар” тамамардайла, кьуьлерунин синифдин аялри чара-чара хал- кьарин кьуьлердайла залдавайбурун ругь амайдалайни хкаж жезвай.
Концертди йисан къене аялри чпин чирвилер мадни мягькемарнавайди, ифачивал хкажиз алакьнавайди субутна.