Паркина Ктабрин сувар

Шегьердин Нариман Нариманован тIварунихъ галай културадин ва ял ягъадай паркина умуммилли лидер Гьейдар Алиев дидедиз хьунин 95, Азербайжандин Халкьдин Жуьмгьурият арадал атунин 100-йисаз талукьарнавай вириреспубликадин Х Ктабрин Сувар шаддаказ къейдна.
Паркинин чара-чара пипIера 39 темада тешкилнавай сергийра 325 тIвар алай 3500 ктаб кIелзавайбурун ихтиярдиз ганвай.
Мярекатда райондин крар кьилиз акъуддай властдин, идара ва карханайрин векилри, мектебрин муаллимри ва кIелзавайбуру, багъчайрин аялрини иштиракзавай.
Ктабрин Сувар сифте гафуналди меркездин ктабханадин директор Загьир Мустафаева ахъа авуна мугьманриз, куьн атуй, рагъ атуй лагьана.
Райондин крар кьилиз акъуддай властдин башчидин мавин Зоя Элдаровади иштиракчийрив райондин чIехидан тебрикар агакьарна, гьакIни умуммилли лидер Гьейдар Алиева уьлкведа култура, тегьсил виниз хкажунин карда кьиле тухвай крарикай, серенжемрикай гаф кудна.
Хачмазин Региондин Културадин идарадин началник Назим Агъаева, райондин тегьсилдин идарадин методкабинетдин директор Къорхмаз Мурадова чпин рахунра тегьсил, илим вини дережадиз акъудунин важибвиликай, и рекье чи тарихдин чешме ва чешнейрикай менфят къачунин гереквиликай фикирар лагьана.
Гуьгъуьналлаз чпин кIвалахар йикъан тIалабрив кьадайвал, вини дережеда тешкилнавай Лечетдин, Зинданмуругъкъишлахдин, ГадацIийи хуьруьн ктабханайрин филиалриз региондин културадин идарадин фехри ферманар гана.
Меркездин ктабханадин директор Загьир Мустафаева чпин патай 10 кас актив кIелзавайдаз фехри ферманар ва пешкешар текьдимна.
Ктабрин Суварин юкъуз кIелзавайбуруз 300-лай виниз ктабар, 200 журнал ва маса савкьатар пай яз гана.
Гьа са чIавуз 125 кIелзавайди ктабханадин кIелзавайбурун жергейрик экечIна.

“КцIар”