Багърийрин арада

Гьейдар Алиеван тIварунихъ галай меркезда сенят канибурун Азербайжан Республикадин Лайих артист, яргъал йисариз Азербайжандин Халкьдин Манийринни Кьуьлерунин Ансамблдин солист хьайи Алия Рамазановадихъ галаз гуьруьш кьиле фена.
Мярекат сифте гафуналди ахъа авур меркездин директор Нева Абдурагьмановади вичин кьуьлерунар дуьняда машгьур тир, гила и кеспи алукьзавайбуруз чирзавай сеняткардин уьмуьрдикай, сенятдин рекьикай ихтилатна:-Алия Рамазанова чи райондин Пирал хуьряй я. Ватандин ЧIехи дяве башламишай 1941-йисуз дидедиз хьайи рушан аялвал пара мишекъетдинди хьана. Хуьруьнвийри диде-буба квадарай гъвечIи руш сифте КцIарин, ахпани Бакудин аялрин кIвализ гана. Анжах уьмуьрдин рекьера къаншардиз акъатай хъсан, экуь инсанрин куьмекдалди адалай четинвилерал эхир эцигиз алакьна.
Алия Рамазановади сенятдин рехъ хкягъна. Ам 16 яшиндаваз сегьнедиз экъечIна ва къениндалди вичин рикI алай сенятдалди халкьдиз къуллугъиз давамзама.
Яргъал рехъ атIана КцIариз хтай чи машгьур ватанэгьлидиз разивал къалурай културадин регионал идарадин КцIар райондин векил Давид Ибрамхалилова, райондин интеллигенциядин векилар тир Лида Къожагъаевади ва Людмила Мамедовади кцIарвийри гьамиша адан вичин, гьакIни телебайрин агалкьунар вилив хуьзвайди, абуралди дамахзавайди лагьана.
Алия ханумди хайи чилел вич хушдаказ кьабулуниз, багърийрин арада хъсан, рикIелай тефидай легьзеяр бахш авуниз килигна и гуьруш ва мярекат тешкилнавайбуруз разивал малумарна.
Ада райондин ансамблрин кьуьлерзавайбурун ифачивилиз къимет гана, абурун бязи рехнеяр къалурна, гьакIни вичи гьазурнавай “Азербайжан маралы” макьамдал куьлна.
Шад мярекат Алия Рамазановадин телебе тир Рена Къафарлыди тамамарай “Лезгинка” кьуьлуьналди кьилиз акъатна.

Лале САДИРОВА