“Алам” вучиз геж акъатна?

Лезги културадин журнал тир “Аламдин” цIинин сад лагьай тилит 5 вацралай акъатна. Бес вучиз икьван геж?
И жузунин жаваб парабуруз сир ятIани, чун-принтмедиадин кIвалахдарриз ашкара кар я: пулунин такьатар авач! Пул тахьайла, кIвалахни хъсан тешкил жезвач. Вучиз лагьайтIа, гила садазни “халахатур” алахъиз канзамач.
Бес пул гьинай атурай? Гьелбетда, журнал маса гунай. 700 тираждин 100 гьавайди (авторриз, ветеранриз, къачудай мумкинвал авачирбуруз, чин алайбуруз…) хьурай. Амай 600-ен гьар сад 5 манатдай къачуртIа, 3000 манат жеда. Идан зур чапханадинди хьурай, зурни кIвалахдарриндини, авторрин. Анжах месэла гьа “тIа”-дал ала: къачуртIа!
Бес журнал вучиз къачузвач? Сад лагьайди, чи чIалан, културадин таъсиб чIугвазвайбур, сенятдин инсанрин гъил кьазвайбур югъ-къандивай кьери жезва. Гила кIелиз, кхьиз канзавайбурухъ пул авач, пул авайбуруз кIелиз канзамач.
Вич пулуни инсанрин милли руьгь рекьизва кьван. Пул гвайбуру сенятдин, културадин инсанрихъ галаз ихтилатдайла чи дердерихъ гафаралди гьикьван шериквал авуртIани, кардал-газет, журнал кхьинал, ктабар къачунал атайла, ихтилатдал гьасятда эхир эцигзава.
И цIарар кIелай гзафбуру лугьунни мумкин я: “На ви дердер заз ахъаймир, зун валайни кайиди я…”. Им тек са “Аламдин” проблема туш. “КцIарни”, “Самурни” гьа са йикъа ава.
Мумкин я, са бязибуру чи кIвалахдин, изданийрин дережадикай, макъалайрин чIалакай, еридикай наразивал ийин. Чна чун цавай физвайбурни гьисабзавач. Анжах тIварар кьур пуд нешрни 2-3 касди арадал гъизвайдини фикирда кьуна канда. Куьз лагьайтIа, чахъ патарив пешекарар (абурни жагъайтIа, атайтIа) агуддай, актив авторриз куьмекардай такьатарни авач.
ГьакI хайила, “Алам”, “Самур”, “КцIар” вучиз геж-геж акъатзава лагьана жузунилай, гьакъи гана са-кьве экземпляр къачун, дустариз, мукьвабуруз пешкешун меслят я! “КцIар”