Аманатар хуьзвай макан

18-Май Виридуьнядин Музейрин Югъ чи музейдани “ахъа ракIарринди” жеда.
Гьар са халкьдихъ вичиз махсус адетар, виликан несилрилай аманат яз амай руьгьдин, гьакIни маддиятдин эменнияр ава. Алай аямдин несилдини виликай къвезвайбуруз вучар ятIани мирас туникайни фикирзава. Ихьтин затIар музейра хуьзва. Са карни дуьшуьшдай туш хьи, чна гьи уьлкведиз фейитIани, анин тарих, гьа халкьдин адетар чирун паталди сифте нубатда музейрал кьил чIугвада.
Музейрин халкьарин, жемиятдин уьмуьрда кьетIен рол фикирда кьуна 1977-йисалай инихъ 18-май Виридуьнядин Музейрин Югъ хьиз къейдзава.
Дуьняд винел сифте музеяр чи эрадилай вилик Критда, Китайда, Римда, Грецияда арадал гъанва. Чи уьлкведа вар-девлет авай, машгьур инсанрин затIар, бахшишар кIватIун-коллекциячивални музейрин сифте пун гьисабиз жеда.
Азербайжандин сифте музей 1919-йисуз-халкьдин жуьмгьуриятдин девирда туькIуьрнва. Уьлкведа 2000-йисуз “Музейрин гьагъинда Къанун кьабулна.
КцIарин дияр чирдай музей 1980-йисуз а чIаван муаллимрин кIвале тешкил хьана. 1982-йисуз ам кьилди музей паталди эцигнавай дараматдиз акъудна.
Райондин музейдай чаз гайи малуматда къейдзава хьи, алай чIавуз адан фондуна 3700 экспонат хуьзва хьи, абурунни 623 экспозиядиз акъудна къалурзава.
2009-2010-йисуз цIийидаказ туьхкIуьр хъувур музейдин вири чка 1652 квадратметр, экспозицийрин чка 266 квадратметр я. Адахъ 4-къадим ва юкьван асиррин, этнографиядин, дяведин йисарин ва алай девирдин залар ава.
-КцIар туризмадин макандиз элкъуьндивай чи музейдиз илифзавай мугьманрин кьадарни пара жезва,- ихтилатзава музейдин директор Хатире Нагъибеговади.-ГьакI тирвиляй чна чи кIвалахни алай девирдихъ галаз кьадайвал тухуз алахъзава.
Чи музейда къадим заманрин гъилин шейэр, парталар, къаб-къажах, яшайишдин, музыкадин, зегьметдин алатар, тIвар-ван авай кцIарвийрин портретар, документар ва абуруз махсус гзаф маса шейэр хуьзва. Атайбуруз чна музей тешкил хьунин тарихдикай, адан метлебдикай, жегьил сихилар тербия авунин карда и чкадин кьетен ролуникай рахазва.
Райондин музейдинни мектебрин коллективрин авсият, кIелзавайбуру хайи тарих ва култура чируниз къалурзавай маракь иллаки къейд авуна канда. Йисан къене тек са майдин вацра инал кьил чугвазвай кIелзавай аялрин кьадар 500-лай пара жезва.
Музейдин экспонатар алатзавай гьар йисуз 40-50 артух жезва. Кьилди фондунин чка тахьуни кIвалахдаррин крар четинарзава. Аквар гьаларай музей паталди цIийи-мадни къулай шартIар авай дарамат эцигдай вяде агакьнава жеди.
18-майдин югъ райондин тарихдинни дияр чирдай музейдани “ахъа ракIарринди” жеда. Буюр, ша ва килига!

“КцIар”