Шад макьамрал Куьлерна

Харусенятдин мектебда Виридуьнядин Кьуьлерунин Югъ кьиле фена.
И югъ вири дуьняда гьар йисуз Франциядин машгьур балетмейстер ва балетдин теоретик Жан Жорж Новерр (1727-1810) дидедиз хьайи тарих асас кьуна къейдзава. Чара-чара фестивалар, конкурсар, мярекатар кьиле тухунин макьсадни халкьарин, миллетрин фикир и дегь девирдин сенятдиз желб авун, инсанриз адан элементар чирун, дегь макьамар яшатмишун я.
Чи уьлкведа харусенятдин театр, музыка, поезия… хьтин са шумуд хел галкIурзавай кьуьлерунин сенятдиз, хореографиядиз чIехи гьевес ва къимет ава. Чи классик музыкадин бине кутур Уьзейир бег Гьажибегова туькIуьрай Азербайжандин Девлетдин Манийринни Кьуьлерунин Ансамбл вири дуьняда машгьур я. РагъэкъечIдай патан улквейрикай сифте яз 2014-йисуз Бакуда Хореографиядин Академия арадал гъана.
Азербайжандин кьуьлерни адан халкьар хьиз жуьреба-жуьрединбур я. Азербайжанвийрихъ “Гьейвагуьлуь”, “Узундере”, “Иннаби”, “Ялли” авай хьиз, лезгийрихъни “Лезгинка”, “Тала”, “Рипе къуьл”, “Магьузар”, “Шамил” ва маса макьамар ава. Къадим чIаварилай кьуьлерунал рикI алай чи халкьдин тварцIихъ галай “Лезгинка” (“Лезги руш”) течир кьуьлерунин гьевескар, яни ансамбл жагъун мумкин туш. Дуьняд винел белки икьван машгьур кьвед лагьай макьам якьач.
29-апрелдиз КцIарин Харусенятдин Мектебда Виридуьнядин Кьуьлерунин Йикъаз талукьарнавай фестивал кьиле фена. Мярекатда харусенятдин мектебдин вичин, шегьердин 1, 2, 4 ва 5 нумрайрин мектебрин кIелзавайбуру, жегьилрикай ибарат тир ансамблри чпин алакьунар къалурна.
Абуру чи милли кьуьлер хьиз урус, уьзбек, гьинд ва маса халкьарин макьамрални чпин алакьунар къалурна. 1-нумрадин мектебдай тир Шанай Руьстема “Туражи”, 5-нумрадин мектебдай Мерям Багъиевади гьинд, 4-нумрадин мектебдай Севда Агьмедовади уьзбек, 2-нумрадин мектебдин аялри къарачийрин кьуьлер, 4-нумрадин мектебдин коллективди валс, харусенятдин мектебдин аялри аваррин кьуьлер, “Лезгинка” ва “Перизада” ифа авуна.
Мярекат адан вири иштиракчийри ялли финалди кьилиз акъатна.

“КцIар”