ЦIуру Худатай Яргундал кьван

21 километрдин яргъивиле авай и рехъ гегьеншарна цIийи кьилелай туьхкIуьрда ва асфалт кутада.
Гуьгъуьнин йисара чи районда рекьерин инфраструктура цIийи авунин крариз кьетIен фикир гузва. КцIарай Лацуз, Самурдай Яргундиз, Яргундай ЦIехуьлиз, ЦIуру Худатай-Кьуьхуьрубадиз физвай рекьер абадарна асфалт цанва.
Нупада акъвазна рекьер кутадайбурун рехъ хуьзвайбурни тIимил туш. Пара хуьрерин жемятар вил рекьеллаз акъвазнава.
Ингье, са шумуд югъ я ЦIуру Худат-Яргун марщрутдин рекье залан тракторри, грейдерри кIвалахзава. Чи мухбирди и рекье туьхкIуьр хъувунин кIвалахар кьиле тухузвай “Талегь” ширкетдин векил Назим Манатиловавай бязи жузунар авунва.
-Им цIуру, гьакIни гзаф хуьрерин жемятри менфят къачузвай са рехъ я, -лагьана чаз Назим стхади-Гьеле алатай асирдин 90-йисара кутунвай асфалтдикай гила аламатни амач. Чи планда рехъ 12 метр кьван гьегьеншарун, чиргъ, накьв авахьзавай гуьне ва кьвалар рекьелай яргъаларун, герек чкайрихъ ятар алатдай гунгар кутун, авайбур михьун, гуьгъуьналлазни фрез ягъана 7-8 метрдин гьяркьуьвиле машинрин гьерекетдин чкада асфалт ктун я.
Къейд ийин хьи, гьисятда уьлчуьда машинри, гьакIни инсанри хъсандиз менфят къачун патал ара датIана кIвалах физва. Эвежугъ хуьруьн къене 800 метрдин, Хьиле 1200 метрдин чкада бордюрар кутуна секияр туькIуьрнава, яхди физвайбуруз регьятвилер арадал гъанва.
Са гафуналди цIуру рехъ цIийи хъийизва, рехъчи инсанрин сеферар кьезиларун патал кIвалах физва. Куь гъилериз къуват гурай, дустар!