Къадим Сувар-шаддаказ

Яран Сувар чи виридалай кани, чIехибуруни, гъвечIибуруни вилив хуьзвай шад мярекатрикай я. Яр чи халкьдин къадим йикъарганда (календарда) гатфарин сад лагьай варз я. Суварин къени, михьи адетар чна саки агъзур йисалай пара я хуьз, несилрилай несилрив агакьариз.
16-мартдиз экуьнахъ фад къарагънавай кцIарвияр адетдалди шегьердин лап чIехи мярекаяр къейдзавай генерал Магьмуд Абилован тIварунихъ галай меркездин майдандал кIватI хьана.
Райондин крар кьилиз акъуддай властдин чIехид Шаир Алхасов кьиле аваз идара ва тешкилатрин регьберар, жегьилар, аялар виликдамаз гьазурнавай зурба гургурдин къерехдиз кIватI хьана.
Райондин регьберди чара-чара тилитрив, хуьрерай атанвай коллективрив агатиз абурун сувар тебрик авуна, агъсакъалриз, жегьилриз, аялариз чандин сагъвал, Ватандиз ислягьвал ва мублагьвал тIалабна.
ЦIийи адетдалди Гатфар ханум майдандиз лацу балкIанар ктIуннавай файтондин чкадал, лацу машиндаваз атана. ГъвечIи-чIехида-вирида гурлу капар ягъана. Гатфар ханума эвичIна сегьнеда вичин чка кьуна, жемятрив суварин тебрикар агакьарна.
Ахпа милли пекер алукIнавай жегьил гадайри Яран цIаяр куькIуьрна. Гургур цавуз хкаж хьайила майдан кьуьлерзавайбурун, манияр лугьузвайбурун, пагьливанрин, гужар синемишзавайбурун ихтиярда гьатна.
Яран Суварин сергьятра аваз гьар йисуз спортдин милли жуьрейрайни акъажунар кьиле фена. ЧIил ялдайбуру, гъилин гужар авайбуру, гирер хкаждайбуру чпин алакьунар къалурна, махсус бахшишарни къачуна.
Чара-чара тIямар алай Яран суфрайрик агатайбуру милли тIуьнрин-афаррин, цкIандин, тугъагъадин, селемадин… дадиниз килигна, чрайбуруз “гъилериз къуват гурай, йис берекатар галайди хьурай” лагьана.
Гьа икI КцIара мад са Яран Сувар шад гьалара кьиле фена.