Муаллимвиляй седривилиз

Алай чIавуз чи районда кардик галай 29 беледиядикай анжах 4-дан кьиле акъвазнавайбур дишегьлияр я. Вучиз, къаст халкьдиз къуллугъ авуникай ибарат тир беледиядин седривал гьакьван залан, чи дишегьлийрилай алакь тейидай везифа яни?

– Зун алатай хкягъунрик жув субутун, и везифа себеб яз са шумуд патаз цIил хьанвай хуьр ахгудун паталди экечIайди я,-лугьузва чи ихтилатчи, Мучугъ Беледиядин седри Тагьире Казимовади.

РикIивайни, жува идарачивилин и тешкилатар арадал атай сифте чIавара хуьрера гьидан сихилдик, тухумдик ванер гудайбур пара тиртIа, гьабурун векиларни седривилиз хкягъзавай. Абурун жергедай яз Мучугъани гьа икI хьана. Гзаф йисара хуьруьн беледиядин кьиле нубатдалди кьве сихилдин векилар акъвазна. Гъил-гъиле гана кIвалахунин, хуьр авадан авуник эгечIунин чкадал кьуру гьуьжетунри стхайрин, дустарин, несилрин арада серинвилер туна.

Анжах 2015-йисуз кьиле фейи хкягъунра жемятрин чIехи паюни чпин ванер гъвечIи КIуррин хуьряй тир жегьил рушаз гунин тек себеб и вакъиаяр тушир. Вич кIурвидин руш яз юкьван мектеб Мучугъа куьтягьай Тагьиреди сифте Дагъустандин Университетдин филологиядин, гуьгъуьнай Азербайжандин Муаллимрин Институтдин тарихдин факултетрик экIечна кьве диплом къачунвай. Хайи хуьре са шумуд йисуз муаллим кIвалахуни, културадин, ижтимаиятдин мярекатра вилик-кьилик хьуни ам гзафбуруз сейли авунвай.

Чи “-Дишегьлийриз хкатIнавай кеспи тир муаллимвал туна беледиядин седривал авун четин тушни?”- суалдиз Тагьиреди икI жаваб гана:

-Уьмуьрдин рекьер гьамиша дуьзенбур, къван-кесек авачирбур жедач хьи. Дуьз лагьайтIа, сифте и кардик кьил кутурла, гзаф четинвилерни гьалтна. Анжах зегьметдиз къимет гуз алакьдай, гьакъисагъ, хъсан инсанар авай чкада манийвилер арадай акъудун акьванни четин хьанач. Алатай кьве йис зун паталди жемятрихъ галаз рафтарда, хуьруьн са бязи месэлеяр гьялунин рекье синагъдинбур хьана. За лугьузвач хьи, кьве йисуз дагъ-дагъдал эхцигна. Гьелбетда, гьялиз тахьанвай месэлаярни амазма, рикIе авай вири къастар гьеле кьилиз акъудиз хьанвач. Анжах беледиядин квахьнавай ихтибар мягькемарна, инсанар фикиррин, крарин садвал хьайила агалкьунар, кьулайвилер жедайдал чIалахъар хъувуна.

Вичихъ вири санал 2100 кас жемятди уьмуьрзавай пуд хуьр-Мучугъ, КIур ва Мучугъпаласа, 2000 гектардилай виниз чилер галай беледиядин йисан буьджет са акьванни паради туш. Анжах къе пуд хуьрени вирида чпихъ беледия авайди, адан ракIар гатана куьмек, меслят къачуз жезвайди кьатIузва. Мучугъа хуьруьн ветеранрин тIалабуналди булах туькIуьрун, тIварар ганвай куьчейрин кьиле талукь лишанар алкIурун, Мучугъпаласа хуьруьн куьчейра чиргъ кутун, сентябрдиз сифте мектебдиз кам вегьизвай бицIекриз виридаз чантаярни дафтар-ктабар багъишун, суварар, кар алай йикъар тешкилна кьиле тухун… ибур Тагьире ханум кьиле акъвазнавай беледиядин ва инин уьзвийрин къайгъуйриз элкъвенва.

-Беледиядин седривал-им халкьдин тапшуругъ, ихтибар я,-лугьузва Тагьире Казимовади,-Муаллимвал лагьайтIа, ам зи мурад, рикIивай кан хьана хкягънавай кеспи, пеше. Ахъаз лагьайтIа, мектебдин синифрихъ, аялрин ванерив ацIанвай коридоррихъ дарих жезва зун. Са вучар ятIани багьна ийиз фад-фад мектебрални кьил чIугвазва. Анжах са юкъуз седривилин эстафета ихтибар авайбурув вахгана аниз эбеди яз элкъвез канда заз.

Камале