Аслутуширвилин югъ къейдна

Гьар са уьлкведин тарихда и йикъа чlехи чка кьазва. Азербайжан вичин аслутуширвилихъ кьвед лагьай гъилерда 1991-йисан 18-октябрдиз галкlун хъувуна. Алатай асирдин 20-йисариз чи кьилдинвилин уьмуьр анжах 23 варз хьанайтlа, гила 21 йис я чна чи азадвал хуьзва, уьлкве вилик тухузва.
И гафар 15-октябрдиз райондин медениятдин сарайда аслутуширвилин 21-йисаз талукьарнавай мярекатда рахай Цlийи Азербайжан Партиядин райондин тешкилатдин седри Давид Ибрамхелилова вичин рахунра мецел гъана.
Уьлкведин аслутуширвилин бине кутурда чи уьмуммилли лидер Гьейдер Алиев тирди къейд авур ада, алатай йисара республикадин, райондин уьмуьрда кьиле фейи важиблу крарикай, кьилиз акъуднавай зурба проектрикай, инсанрин яшайишда хьанвай кьетlен дегишвилерикай рахана.
Аслутуширвилин сувариз Кцlара мугьман тир Иревандин Азербайжан театрдин коллективди чи тарихдин чара-чара этапра кьиле фейи вакъиайрикай рахазвай тамаша къалурна.
Шикилда: тамашадикай са сегьне.