ХАЙИ Хьиле-ХаЙИ КIВАЛЕ

1932-йисан сентябрдиз АК (б) Ф Хьилер Райондин Комитетдин ва райондин исполкомдин  гьафтеда садра “Сосялизмад темп” тIвар алаз акъатай органди вичин сифте камар райондин меркез тир и чIехи хуьре вегьенай.Идан гьакъиндай республикадин “Коммунист” газетди вичин 1932-йисан 9-октябрдиз акъатай 237-нумрада икI кхьенвай: “Эхир хьи, чун пуд лагьай чIехи гъалибвиликай рахан. ТIимил сандин миллетрин арада революциядал кьван культурадин фронтда вичиз са затIни авачир ва тек са вичин “вагьшивилив”, лезгинка кьуьлуьналди, черкескадалди ва хенжелдалди “машгьур” тир лезги халкь къенин юкъуз мектебрин, эдебиятдин, прессадин ва маса затIарин иеси хьанва.

И мукьвара Хьилер Райондин Комитетдин ва исполкомдин орган яз лезги ва туьрк чIаларал “Сосялизм темпи” тIвар алай газет ахъаюни гьа и кар субутзава”.
Гуьгъуьнай- “кIвачи чил кьурдалай” кьулухъ ам КцIариз- цIийи меркездиз хтанай.
2012-йисан сентябрдиз- зулун сифте юкъуз  “Гусар КцIар” тIвар алаз акъатзавай райондин газетдин гъвечIи коллектив Хьиле мугьман хьана.
Хуьруьн културадин кIвале хьиливи            агъсакъалрин, крар кьилиз акъуддай властдин, беледиядин кIвалахдаррин, муаллимрин, режберрин векилрик галаз кьиле фейи гуьруьш маракьлуди, гьам журналистар, гьам кIелзавайбур патал хийирлуди хьана.
Ам сифте гафуналди райондин крар кьилиз акъуддай властди башчидин хуьре векил Чингиз Давыдова ачухна.
“Гусар КцIар” газетдин редактор Видади Севзиханова райондин  сифте    газет арадал атунин тарихдикай, ам фейи этаприкай, къенин юкъуз коллектив секинсузарзавай проблемайрикай гаф кудна.
“Элкъвей столдихъ” гаф къачур муаллимар- Дустали Муьрселова, Шагьабеддин Пашаева,  Айнаханум Рефиевади, Абдурза Мамедрзаева, Рамиддин Элиярова, Адил Агъаларова, Бейлер Алескерова, Кифает Багъишевади, духтур Негьру Гьуьсейнова  газетдин 80-йисан юбилей тебрик авуник галаз санал, ам мадни хъсан хьун патал чпин теклифар, мурадарни мецел гъана. Кьилди къачуртIа, теклифар ихьтинбур тир:
-мектебрикай, чешнелу муаллимрин кIвалахрикай, хъсан кIелзавай аялрикай фад-фад материалар гун;
-чи руьгьдин эменнияр хуьзвай кьуьзуьбурун ихтилатар, яргъалди санал яшамишнавай, хъсан хизанар туькIуьрнавай сая инсанарикай очеркар чап авун;
-хизанар чкIунин себебар винел акъудзавай, гьакIни чешне хизанрин тежриба къалурзавай макъалайриз гзаф чка гун.
Дяведин ва зегьметдин ветеран, яшар 90-лай алатнавай Эмирбег Эмирбегован ихтилатрик, газетдик галаз алакъалу рикIел хкунрик гуьруьшдин иштиракчийри пIузаррал хъвер алаз яб акална. Агъсакьалди вич асул “хьиливи” тир хайи, милли газет хуьнун, адаз гьар жуьредин куьмекар къалурунин важиблувиликай рахана.
Гуьруьшдин эхирда чи фотокорреспондентди адан иштиракчийрин коллектив шикил чIугна.