КIваликай хьиз хуьруькайни фикирна

Хьиливияр-Рамик Багъишова ва Нур Уружова хайи хуьре цин проблема арадай акъудуник пай кутунва.Iехи хуьрера къайгъуярни пара жеда. Чи районда ваъ, гьакIни уьлкведа лап зурба хуьрекай тир Хьиле алай вахтунда 3 агъзур майишатда 5 агъзурдилай гзаф агьалияр яшамишзава.

 

 

Виликра хуьр са гъвечIи майдандал экя хьанвайтIа, гила адан яргъивални гьяркьуьвал цIуд километрийралди алцумиз жеда. Бес икьван зурба макандин цин, экверин, рекьерин проблемаяр гьикI гьалзава?
Хуьруьн беледиядин седридин мавинвиле кIвалахзавай Даир Бекерова чи суалдиз жаваб яз лагьана:
-Хьиливи жегьилрин, юкьван яшарин инсанрин гзафбур хуьрелай яргъара ава. Абурал тахсирни эцигиз жедач: кIвалахдин чкаяр тIимил, къазанжи агъуз тирвиляй гъурбатриз финиз мажбур жезва. Виридан мурадни хайи хуьре кIвал-югъ кутун, яшайишдин шартIар хъсанарун я. Ингье, гьакI тирвиляй гила Хьилеринни Ясабрин часпар амач. Гзаф жегьилар тамарик агатзава, кIунтIарал, пелерал хъсан дараматар эцигзава. Куьне гьахълудаказ хабар кьазва: бес рехъ, экв, яд? Идакай ахпа фикирарзава, шикаятар башламишзава.Чи беледиядин къайгъуярни гьа инлай башламишзава…
Яд Хьиле вири чIавара кьитI хьайиди я. Хуьруьн юкьвал алай булахдал рушари, сусари сятралди нупа хуьзвай йикъар рикIел хкин бес я.
-Аллагьдиз шукур, къе хьиливи жегьилрин са бязибуру тек са вичин кIваликай ваъ, мягьледикай, хуьруькайни фикирарзава,-лугьузва беледиядин кIвалахдарди-Хуьруьн абадвилик, яшайишдин шартIар хъсанаруник пай кутазвай хьиливияр тIимил туш…
Рамик Мевлудан хва Багъишов и хуьряй лув гай жегьилрикай сад я. Алай береда Вологдада уьмуьрзавай жегьилди хуьруьнвийрин цикай чIугзавай азият рикIив кьуна. Беледиядин, крар кьилиз акъуддай властдин векилрихъ, агъсакъалрихъ галаз меслятар авурдилай кьулухъ “Пашад пел” лугьудай чкадал цин гьамбар эцигдай икьрардал атана. “Харжияр зиди- зегьметар куьди!” – лагьана жегьил хьиливиди!
Пул къазанмишунин заланвал чизвай бизнесменди фикирда кьунвай крар кьиле тухун вичин жегьил мирес Элнар Аслановал ихтибарна.
-Къенин йикъалди 12 агъзур манатдилай виниз пул харж хьанва лугьузва Элнара. -КIвалахарни саки тамам хьанва: 130 тоннадин гьамбар цив ацIанва. И яд 16 километрдин яргъай, тамун къеняй къвезва. Цин дурбуйрик чарабуру кцягъ тавун патал чна абур са метрдилай пара дегьринда тунва. ИкI хьайила хъуьтIуьз муркни кьадач.
Чи чIехибуру рекьинвидиз яд гун, булах акъудун суваб крар гьисабдай. Ихьтин суваб кар кьилиз акъуднавай са хьиливини Нур Уружан хва Уружов я. Нур стхади “Булахдин кама” эцигнавай амбарди 60 тонн яд кьазва. Амбар алай чка хъсандаказ чапарда кьуна ана ял ягъадай пIипI туькIуьрна, къецелни са булах акъуднава касди. Нур муаллимдиз тек са хуьруьнвийри ваъ, инлай алатна физвай рекьинвийрини алхишзава. И цикай чнани хъвана ва гьакI алахьна финин гьайифни чIугуна:
-И ятарал крантар эцигна адаз мадарайтIа, идалай агъуз авайбурувни агакьдайвал авуртIа хъсан тушни? – хабар кьуна чна Даир Бекеровавай.
-Гьелбетда хъсан я. Чна и кардин теблигъат тухузва, инсанар гъавурда кутаз алахъзава. Гьайиф хьи виридан къанажагъ Рамик стхадин, Нур муаллимдин кьван туш. Анжах чун чIалахъ я: са тIимил чIавалай хьиливийрин парабуру кIваликай хьиз хуьруькайни фикирда, ам абад, авадан хьунин къайгъуда амукьда.
Садай Севзиханов
Шикилра: Рамик Багъишован такьатралди эцигнавай 130 тоннадин (эрчIи пата) ва Нур Уружова арадал гъанвай 65 тоннадин цин амбарар.