Фестивалдиз “цIкIан”, “алуга”… гваз фена…

Бакуда 20-октябрдиз кьиле фейи Виридуьнядин Кулинариядин Йикъаз талу- кьарнавай Виридуьнядин I “Фарин фестивал”да чи кулинаррини иштиракна.

Чи уьлкведин 24 шегьер ва райондин, гьакIни Къиргъизистандин, Туьркиедин, Украинадин кулинарри иштиракзавай мярекатда кцIарвийри туькIуьрнавай суфра муькуь гьужетуник экечIнавайбуру чранвай тIямрилай са кIусни рикIи тухудайди тушир.

Фестивал кьиле физвай “Мугъамдин къул” ресторандиз гьа юкъуз атанвай мугьманар лезгийри дегь девиррилай къениндалди чразвай хьран, танурдин, сачун фар, гьакIни цкIан, алуга, афар гьазурунин къайдайрихъ галаз таниш хьана.

Сад лагьай Виридуьнядин Фестивалда иштирак авур райондин културадин ва туризмадин идарадин зеведиш Давид Ибрамхалилова чи мухбирдихъ галаз ихтилатдайла лагьана:

-И югъ чи уьлкведин инициативадалди Виридуьнядин Кулинариядин Тешкилатдин Бирлигди 2004-йисуз кьабулнавайди я. Алай чIавуз дуьняда 115 уьлкведай тир 10 миллиондилай пара пешекарди и сувар къейд ийизва. ТIуьн тек са тухвал таъминардай, каш рекьидай месела ваъ, гьакIни гьар са халкьдин суфрадин култура къалурзавай кIвалах я. Фу лагьайтIа, “суфрадин кьил”, виридалай багьа са нямет гьисабзава чи халкьди. Завай хьайитIа, гьакIни фестивалдин иштиракчийрини къейд авурвал кцIарвийрин фарин жуьреяр парабуруз бегенмиш хьана.  

“кцIар”