“Зи илгьам хайи Чилин акунри куькIуьрна”

КцIарин Девлетдин Шикилрин Галереяда чи   ватанэгьли, архитектор, чIугвар Тофик Буржумован эсеррикай ибарат выставка ахъа хьана.

КцIарвийриз ам художник хьиз са акьван хъсан чизвачиртIани, сеняткарди вичи хайи район, чара-чара хуьрер, хайи тIебиатдин мензереяр сая районэгьлийрилай хъсан кьатIана, кетендал куьчариз алакьнавайди, адан таблойриз килигайла кьатIун четин тушир. ЧIугвардин “ЭчIехуьр”, “Шагьдагъдиз физвай рехъ”, “Кцарин кьуьд”, “Зи хтул София”, “Маяк”, “Къизил зул” ва маса эсеррин вилик яргъалди кIвач хуьзвай сейрчийрин чинрай аквазвай гьейранвили и кар мадни субутзавай.

Выставка ахъа авунин мярекатда гаф къачур райондин културадин ва туризмадин идарадин зеведиш Давид Ибрамхалилова, галереядин директор Нермине Салмановади Тофик муаллимдин уьмуьрдин ва яратмишунрин рекьикай кIватI хьанвайбуруз малумат гана.

Бубайрин Ватан ЭчIехуьр тир Тофик Мегьамедан хва Буржумов 1947-йисуз Бакуда дидедиз хьанва. Ада 1975-йисуз Бакудин Политехникадин институтдин архитектурадин факултет кьилиз акъудна чара-чара эцигунрин идарайра архитектор, кьилин пешекар хьиз кIвалахнава. Бакуда, Сумгаитда ва са шумуд районда ам автор тир къадалай пара дарамат ава. Ада “Берпачи”, “Ичери шегьер” фирмайра квалахдайла туьхкIуьр хъувунин проектрин кьилин экспертди хьиз тарихдин къимет авай цIудралди гуьмбетдиз цIийи уьмуьр хгуник вичин пай кутунва.

2011-йисуз РФ-дин Чечен Республикадин меркез Грознда адан регьбервилелди шегьердин кьилинбурукай тир Ахмат Кадырован тIварунихъ галай проспект цIийи кьиляй туьхкIуьр хъувунва.

-Художниквал зи аял чIаван мурад тир,-лугьузва Тофик муаллимди,-12 яшинда авайла зун пионеррин кIвале и кружокдиз фенай. Аквар гьаларай кьисмет гьа ихьтинди хьана канзавай жеди. Анжах мадни геж туш, гила захъ вахтарни пара ава, жувни зи илгьам куькIуьрай хайи КцIариз хтанва…

Экспозиция июндин 12-далди давам жеда.              

     “КцIар